സ്ഫോടക വസ്തുനിയമ ചട്ടഭേദഗതി : സംസ്ഥാനം ഉത്കണ്ഠ രേഖപ്പെടുത്തി ; മുഖ്യമന്ത്രി കേന്ദ്രത്തിന്‌ കത്തയക്കും
തിരുവനന്തപുരം തൃശൂർപൂരമടക്കം കേരളത്തിലെ പ്രധാന ഉത്സവങ്ങളെ ബാധിക്കുന്ന കേന്ദ്ര സ്‌ഫോടകവസ്‌തു നിയമത്തിലെ ചട്ടഭേദഗതിയിൽ സംസ്ഥാന മന്ത്രിസഭ ഉൽക്കണ്ഠ രേഖപ്പെടുത്തി. വിഷയത്തിന്റെ ഗൗരവം ഉൾക്കൊണ്ട്‌ പരിഹാരം കാണാനാവശ്യപ്പെട്ട്‌ കേന്ദ്രസർക്കാരിന്‌ കത്തയക്കാൻ മന്ത്രിസഭായോഗം മുഖ്യമന്ത്രിയെ ചുമതലപ്പെടുത്തി. ഔദ്യോഗികമായി നേരത്തേയും കത്തയച്ചിരുന്നു. ഒക്ടോബർ 11 നാണ്‌ കേന്ദ്രസർക്കാർ സ്‌ഫോടകവസ്‌തു നിയമത്തിലെ ചട്ടം ഭേദഗതി ചെയ്‌ത്‌ ഉത്തരവിട്ടത്‌. ഭേദഗതി പ്രാബല്യത്തിലായാൽ കേരളത്തിലെ ആരാധനാലയങ്ങളിലെ വെടിക്കെട്ട് പൂർണമായും മുടങ്ങും. തൃശൂർ പൂരം അടക്കം പല ഉത്സവങ്ങളുടെയും വെടിക്കെട്ട് ഇല്ലാതാകും. കേന്ദ്രസർക്കാരിന്റെ ഉത്തരവ് തൃശൂർപൂരത്തെ തകർക്കാനുള്ള നീക്കമാണെന്നതരത്തിൽ പ്രതിഷേധങ്ങളും ഉയർന്നിരുന്നു.വെടിക്കെട്ട് പുരയിൽനിന്ന് കുറഞ്ഞത്‌ 200 മീറ്റർ അകലെ വെടിക്കെട്ട് നടത്തണമെന്നാണ്‌ പ്രധാന ഭേദഗതി. ഈ നിബന്ധനപ്രകാരം തൃശൂർ പൂരം വെടിക്കെട്ട് സ്വരാജ് റൗണ്ടിൽപ്പോലും നടത്താനാകില്ല. ഫയർലൈനും ആളുകളും തമ്മിലെ അകലം 100 മീറ്റർ വേണമെന്നും ഉത്തരവിലുണ്ട്. പ്രധാന ആരാധനാലയങ്ങളുടെ മൈതാനത്തിൽ ഇതിന്‌ സൗകര്യങ്ങളില്ല. പുതിയ നിയന്ത്രണം പ്രകാരം സ്വരാജ് റൗണ്ടിന്റെ പരിസരത്തുപോലും ആളെ നിർത്താനാകില്ല. അപകടം ഒഴിവാക്കാനുള്ള നിയന്ത്രണങ്ങൾ ശക്തമാണെന്നിരിക്കെ അനാവശ്യമായും യുക്തിയില്ലാത്തതുമായ തീരുമാനമാണിതെന്ന്‌ വിദഗ്ധരും അഭിപ്രായപ്പെടുന്നു. 2008ലെ നിയമപ്രകാരം ഫയർലൈൻ പരിധി 45 മീറ്ററായിരുന്നു. കഴിഞ്ഞ പൂരത്തിന്‌ കേന്ദ്ര നിയമപ്രകാരം 100 മീറ്റർ ദൂരപരിധിയാക്കിയത്‌ സംബന്ധിച്ച്‌ തർക്കം ഉയർന്നിരുന്നു. 100 മീറ്റർ ദൂരപരിധി 60 മീറ്ററാക്കി കുറയ്‌ക്കുമെന്ന്‌ കേന്ദ്രസഹമന്ത്രി സുരേഷ്‌ഗോപി പ്രഖ്യാപിച്ചിരുന്നെങ്കിലും ഫലമുണ്ടായില്ല. മന്ത്രിസഭായോഗ തീരുമാനങ്ങൾ മാലിന്യ സംസ്കരണ പ്ലാൻറുകൾ സ്ഥാപിക്കാൻ ഭൂമി അനുവദിക്കും സംസ്ഥാനത്തെ എല്ലാ തദ്ദേശ സ്വയംഭരണപ്രദേശത്തും എംഐസിഎഫ് നിർമ്മിക്കുന്നതിന് സർക്കാർ പുറമ്പോക്ക് ഭൂമി അനുവദിക്കും. ഓരോ കേസും പ്രത്യേകം പരിഗണിച്ചാണ് അനുവദിക്കുക. മാലിന്യ സംസ്കരണ പ്ലാൻറകൾ സ്ഥാപിക്കാൻ ഭൂമി അനുവദിക്കുന്നതിന് ജില്ലാ കളക്ടർമാർക്കു അനുമതി നൽകിയ മാതൃകയിലാവും ഇത്. സാധൂകരിച്ചു വയനാട് ദുരന്തത്തിൽ നഷ്ടമായതോ/നശിച്ചുപോയതോ ആയ ആധാരങ്ങളുടെ സാക്ഷ്യപ്പെടുത്തിയ പകർപ്പുകൾ, ബാധ്യതാസർട്ടിഫിക്കറ്റ് എന്നിവ ദുരന്തബാധിതർക്ക് സൗജന്യമായി നൽകുന്നതിന് മുദ്ര വിലയും രജിസ്ട്രേഷൻ ഫീസും ഒഴിവാക്കി നൽകിയത് സാധൂകരിച്ചു. ഭൂപരിധിയിൽ ഇളവ് എറണാകുളം രാജഗിരി ഹെൽത്ത് കെയർ ആൻറ് ചാരിറ്റബിൾ ട്രസ്റ്റിന് ആശുപത്രി വികസനത്തിന് ഭൂപരിഷ്കരണ നിയമപ്രകാരം നിബന്ധനകളോടെ ഭൂപരിധിയിൽ ഇളവ് അനുവദിക്കും. ടെണ്ടർ അംഗീകരിച്ചു നബാർഡ് ആർഡിഎഫ് പദ്ധതിപ്രകാരം ഭരണാനുമതി നൽകിയ ആലപ്പുഴ മണ്ണഞ്ചേരി പെരുംതുരുത്തിക്കരി പാടശേഖരത്തിൻറെ മെച്ചപ്പെടുത്തലുകളുമായി ബന്ധപ്പെട്ട പ്രവർത്തിക്കുള്ള ടെണ്ടർ അംഗീകരിച്ചു. എൻറെ കേരളം പോർട്ടൽ പൊതുജന സമ്പർക്കത്തിൻറെ ഭാഗമായി കിഫ്ബി ധനസഹായത്തോടെ വിവര പൊതുജന സമ്പർക്ക വകുപ്പിന് കീഴിൽ എൻറെ കേരളം പോർട്ടൽ ആരംഭിക്കുന്നതിനും സ്പെഷ്യൽ സ്ട്രാറ്റജി ആൻറ് കമ്മ്യൂണിക്കേഷൻ ടീമിനെ ഒരു വർഷത്തേക്ക് രൂപീകരിക്കുന്നതിനും സിഡിറ്റ് സമർപ്പിച്ച നിർദ്ദേശം അംഗീകരിച്ചു. Read on deshabhimani.com