ഇഷ്ടമാണ്‌ നീർപക്ഷികൾക്ക്‌ കണ്ണൂരിനെ
കണ്ണൂർ ജില്ലയിൽ കൊറ്റില്ലങ്ങളുടെ എണ്ണത്തിൽ 108 ശതമാനം വർധന. വനം വകുപ്പ്‌ സാമൂഹ്യ വനവൽക്കരണ വിഭാഗവും മലബാർ അവയർനെസ്‌ ആൻഡ്‌ റസ്‌ക്യൂ സെന്റർ ഫോർ വൈൽഡ്‌ ലൈഫും (മാർക്ക്‌) ചേർന്ന്‌ നടത്തിയ സർവേയിലാണ്‌ വർധന കണ്ടെത്തിയത്‌. വംശനാശഭീഷണി നേരിടുന്ന ചേരക്കൊക്കൻ ജില്ലയിൽ താമസമുറപ്പിച്ചെന്നും കണ്ടെത്തി. ഈ വർഷം 12 ഇനം നീർപ്പക്ഷികളുടെ 1752 കൂടുകളാണ്‌ കണ്ടെത്തിയത്‌. കഴിഞ്ഞ വർഷം 800 കൂടുകളാണ്‌ ഉണ്ടായിരുന്നത്‌. കുളക്കൊക്ക്‌, കിന്നരി നീർക്കാക്ക എന്നിവയുടെ കൊറ്റില്ലങ്ങൾ വർധിച്ചു. കഴിഞ്ഞവർഷം കുളക്കൊക്കുകളുടെ 535 കൂടുകളാണ്‌ കണ്ടെത്തിയതെങ്കിൽ ഈ വർഷം 1165 ആയി ഉയർന്നു. കിന്നരി നീർക്കാക്കളുടെ കൂടുകളിൽ 239 ശതമാനം വർധന ഈ വർഷം രേഖപ്പെടുത്തി. കഴിഞ്ഞ വർഷം 59 കൂടാണ്‌ കണ്ടെത്തിയത്‌. വംശനാശഭീഷണി നേരിടുന്ന കഷണ്ടിക്കൊക്കുകളുടെ ആറ്‌ കൂടുകൾ വളപട്ടണം കണ്ടൽക്കാടുകൾക്കിടയിൽ കണ്ടെത്തി. ചേരക്കോഴികളുടെ 16 കൂടുകൾ എളയാവൂർ ഭാഗത്ത്‌ കാനാമ്പുഴയുടെ തീരങ്ങളിൽ കണ്ടെത്തി. മലപ്പുറം ജില്ലയിൽ മാത്രം കാണുന്ന ചേരക്കൊക്കന്റെ കൂടുകളും തലശേരി ബാലത്തിൽ പാലത്തിന്‌ സമീപം കണ്ടെത്തി. ഡോ. റോഷ്‌നാഥ്‌ രമേശിന്റെ നേതൃത്വത്തിലാണ് സർവേ. കാലിമുണ്ടി, ചാരമുണ്ടി, ചിന്നമുണ്ടി , പെരുമുണ്ടി, ഇടമുണ്ടി, ചായമുണ്ടി, പാതിരാക്കൊക്ക്‌, ചേരക്കൊക്കൻ, കഷണ്ടിക്കൊക്ക്‌, ചേരക്കോഴി എന്നിവയുടെ കൊറ്റില്ലങ്ങളും സർവേയിൽ കണ്ടെത്തി. Read on deshabhimani.com