ബലാത്സംഗ കേസിൽ പൊലീസുകാരൻ അറസ്റ്റിൽ
കളമശേരി സ്റ്റേഷനിൽ പരാതിയുമായെത്തിയ സ്ത്രീയെ ബലാത്സംഗം ചെയ്‌ത കേസിൽ പൊലീസുകാരൻ അറസ്റ്റിൽ. ഇൻഫോപാർക്ക് സ്റ്റേഷനിലെ സീനിയർ സിവിൽ പൊലീസ് ഓഫീസർ ചേർത്തല പെരുമ്പള്ളം ഇടയത്തുവെളി വീട്ടിൽ ഇ എൻ സനീഷിനെയാണ്‌ (43) കളമശേരി പൊലീസ് അറസ്റ്റ്‌ ചെയ്‌തത്. ഇയാൾ കളമശേരി സ്റ്റേഷനിൽ ജോലിചെയ്തിരുന്നപ്പോഴാണ്‌ സംഭവം. തൃക്കാക്കര സ്വദേശിയായ നാൽപ്പത്തഞ്ചുകാരിയാണ്‌ പരാതി നൽകിയത്‌. 2021 ഡിസംബർ 31 മുതൽ ഇയാൾ പരാതിക്കാരിയെ നിരന്തരം പിന്തുടർന്ന് ശല്യം ചെയ്യുകയായിരുന്നുവെന്ന്‌ എഫ്‌ഐആറിൽ പറയുന്നു. തുടർന്ന്‌ സെപ്‌തംബർ 25ന്‌ പരാതിക്കാരിയുടെ ഫ്ലാറ്റിലെത്തി ബലാത്സംഗം ചെയ്‌തു. ദൃശ്യങ്ങൾ മൊബൈൽ ഫോണിൽ പകർത്തുകയും ചെയ്‌തു. ഒക്‌ടോബർ രണ്ടിന്‌ ലൈംഗിക ആവശ്യവുമായി വീണ്ടും സമീപിച്ചതായും എഫ്‌ഐആറിലുണ്ട്‌. പ്രതിയെ കോടതിയിൽ ഹാജരാക്കി. Read on deshabhimani.com