ശബരിമല തീർഥാടകരുടെ വാഹനം മറിഞ്ഞു; 2പേർക്ക് പരിക്ക്
ചെറുതാഴം ശബരിമല ദർശനം കഴിഞ്ഞ് മടങ്ങുകയായിരുന്ന കർണാടക സ്വദേശികളായ തീർഥാടകരുടെ ബസ് നിയന്ത്രണംവിട്ട് മറിഞ്ഞ് രണ്ട് പേർക്ക് പരിക്ക്. ചെറുതാഴം അമ്പലം റോഡിൽ ഞായർ രാവിലെ ഏഴോടെയായിരുന്നു അപകടം. കർണാടക ഹാസ്സൻ ജില്ലയിലെ തവരഹള്ളി സ്വദേശികളായ നാഗരാജ്, നന്ദീഷ് എന്നിവർക്കാണ് പരിക്കേറ്റത്‌. അഞ്ചു കുട്ടികളടക്കം 23 പേരാണ് ബസിലുണ്ടായിരുന്നത്. ഡ്രൈവർ ഉറങ്ങിപ്പോയതാണ് അപകട കാരണമെന്നാണ് നിഗമനം. നിയന്ത്രണംവിട്ട ബസ് എതിർദിശയിൽ റോഡരികിലെ പോസ്റ്റിലിടിച്ച് സമീപത്തെ വീട്ടുമതിൽ തകർത്ത് മറിയുകയായിരുന്നു. നാട്ടുകാരുടെ നേതൃത്വത്തിൽ ഉടൻ രക്ഷാപ്രവർത്തനംനടത്തി. എം വിജിൻ എംഎൽഎയും പരിയാരം പൊലീസും സ്ഥലത്തെത്തി തീർഥാടകരെ മറ്റൊരു വാഹനത്തിലേക്ക് മാറ്റി. പരിക്കേറ്റവർക്ക്‌ കണ്ണൂർ ഗവ. മെഡിക്കൽ കോളേജ്‌ ആശുപത്രിയിൽ പ്രാഥമിക ചികിത്സനൽകിയശേഷം വിട്ടു. Read on deshabhimani.com