സഫിയയുടെ ശേഷിപ്പുകൾ ഇന്ന്‌ ഏറ്റുവാങ്ങും
കാസർകോട്‌ സഫിയ കൊലക്കേസിലെ നിർണായക തെളിവായ തലയോട്ടി സംസ്കാര ചടങ്ങുകൾക്കായി മാതാപിതാക്കൾ തിങ്കളാഴ്‌ച ഏറ്റുവാങ്ങും. 2006–-ലാണ്‌ കുടക്‌ അയ്യങ്കേരി സ്വദേശിനി സഫിയ (13) ഗോവയിൽ കൊല്ലപ്പെട്ടത്‌. 2008ൽ ഗോവയിലെ അണക്കെട്ടിന്‌ സമീപം തലയോട്ടി കണ്ടെടുത്തു. സംഭവത്തിൽ ഗോവയിൽ കരാർ ജോലിക്കാരായ മുളിയാർ സ്വദേശി കെ സി ഹംസയെയും ഭാര്യ മൈമൂനയെയും പൊലീസ്‌ അറസ്റ്റ്‌ ചെയ്തു. ചോദ്യം ചെയ്യലിൽ പ്രതികൾ സഫിയയെ കൊന്ന്‌ കഷണങ്ങളായി മുറിച്ച്‌ പുഴക്കരയിൽ കുഴിച്ചുമൂടിയതാണെന്ന്‌ സമ്മതിച്ചു. ഇവരുടെ വീട്ടിലെ ജോലിക്കാരിയായിരുന്നു സഫിയ. അന്വേഷണ ചുമതലയുണ്ടായിരുന്ന ക്രൈംബ്രാഞ്ച്‌ കുറ്റപത്രത്തിനൊപ്പം തലയോട്ടിയുൾപ്പെടെയുള്ള ഭാഗങ്ങൾ കോടതിയിൽ കൈമാറിയിരുന്നു. മകളെ മതാചാര പ്രകാരം സംസ്കരിക്കണമെന്ന്‌ ആവശ്യപ്പെട്ട്‌ മാതാപിതാക്കൾ കഴിഞ്ഞ മാസമാണ്‌ കോടതിയെ സമീപിച്ചത്‌. പബ്ലിക്‌ പ്രോസിക്യൂട്ടർ സി ഷുക്കൂർ സമർപ്പിച്ച ഹർജിയിൽ ജില്ലാ പ്രിൻസിപ്പൽ സെഷൻസ്‌ കോടതി ജഡ്‌ജ്‌ സാനു എസ്‌ പണിക്കരാണ്‌ ശരീരഭാഗങ്ങൾ വിട്ടുനൽകാൻ ഉത്തരവിട്ടത്‌. Read on deshabhimani.com