ഇന്‍ഷുറന്‍സ് തുക നല്‍കിയില്ല കമ്പനി 99,403 രൂപ നഷ്ടപരിഹാരം നല്‍കാന്‍ വിധി
കാഞ്ഞങ്ങാട് മെഡിക്കൽ ഇൻഷുറൻസിന്റെ പേരിൽ വർഷങ്ങളോളം പ്രീമിയം തുക കൈപ്പറ്റിയിട്ടും ഇൻഷൂറൻസ് തുക നല്കാതെ കബളിപ്പിച്ച കമ്പനിക്കെതിരെ ജില്ലാ ഉപഭോക്തൃ കോടതി വിധി. കോർപ്പറേറ്റ് സ്ഥാപനമായ ബജാജ് അലിയൻസിനും ഏജൻസി സ്ഥാപനമായ മുംബൈ ആസ്ഥാനമായ ഹെൽത്ത് ഇന്ത്യാ ടിപിഎ സർവീസും പരാതിക്കാരന് കോടതിച്ചിലവടക്കം 99,403 രൂപ നഷ്ടപരിഹാരമായി നൽകാനാണ് കോടതി ഉത്തരവിട്ടത്. മടിക്കൈ കാഞ്ഞിരപ്പൊയിൽ തണ്ണീർപന്തൽ സ്വദേശി മാളിയേക്കൽ വീട്ടിൽ ജോസ് ഡാനിയേലാണ് പരാതിക്കാരൻ. പ്രതിവർഷം പതിനഞ്ചായിരം രൂപ പ്രീമിയം തുകയായി അടക്കുന്ന ബജാജ് അലിയൻസിന്റെ ഫാമിലി മെഡിക്കൽ ഇൻഷൂറൻസ് പദ്ധതിയിൽ ചേർന്ന ഡാനിയേൽ ഒമ്പതു വർഷം തുടർച്ചയായി പ്രീമിയം അടച്ച് കഴിഞ്ഞപ്പോൾ മകന്റെ കൈയിലെ ഞരമ്പ് സംബന്ധമായ രോഗത്തിന് മംഗളൂരു ആശുപത്രിയിൽ ശസ്ത്രക്രിയ നടത്തിയതിനാൽ 62,000 ത്തോളം രൂപ ചിലവായി. ഈ തുക ഇൻഷുറൻസ് തുകയായി ലഭിക്കാൻ കമ്പനിയെ സമീപിച്ചപ്പോൾ രണ്ടുസ്ഥാപനങ്ങളും കൈയൊഴിഞ്ഞു. തുടർന്ന് 2022 ഫെബ്രുവരി 22 ന് ജില്ലാ ഉപഭോക്തൃ കോടതിയിൽ ഹർജി നൽകുകയായിരുന്നു. Read on deshabhimani.com