ആലപ്പുഴയില്‍ കണ്ടെത്തിയ കാഞ്ഞങ്ങാട് സ്വദേശിയെ ബന്ധുക്കള്‍ക്കൊപ്പം വിട്ടു
കാഞ്ഞങ്ങാട് കാഞ്ഞങ്ങാട്ടുനിന്ന് കാണാതായ ആളെ ആലപ്പുഴയിൽ കണ്ടെത്തി. കാഞ്ഞങ്ങാട് സൗത്ത് മൂർഖൻകാവിലെ പി ശിവരാമനെയാണ് കഴിഞ്ഞ ദിവസം ആലപ്പുഴയിൽ കണ്ടെത്തിയത്. ശിവരാമനെ പൊലീസ് നാട്ടിലെത്തിച്ച് ഹൊസ്ദുർഗ് ജുഡീഷ്യൽ ഒന്നാംക്ലാസ് മജിസ്ത്രേട്ട് കോടതിയിൽ ഹാജരാക്കി. കോടതി ബന്ധുക്കൾക്കൊപ്പം വിട്ടയച്ചു. ഏപ്രിൽ എട്ടുമുതലാണ് ശിവരാമനെ കാണാതായത്. സഹോദരന്റെ പരാതിയിൽ ഹൊസ്ദുർഗ് പൊലീസ് കേസെടുത്ത് അന്വേഷണം നടത്തി വരികയായിരുന്നു. സിവിൽ പൊലീസ് ഓഫീസർ ഷൈജു വെള്ളൂരിന്റെ നേതൃത്വത്തിൽ നടത്തിയ അന്വേഷണത്തിനൊടുവിലാണ് ആലപ്പുഴ പൊലീസിന്റെ സഹായത്തോടെ കണ്ടെത്തിയത്. അഞ്ചുമാസം മുമ്പ് മംഗളൂരു റെയിൽവേ സ്റ്റേഷനിൽ നിന്ന് പണവും രേഖകളുമടങ്ങുന്ന ബാഗ് മോഷണം പോയെന്നും ഇതിലുള്ള മനോവിഷമം കാരണമാണ് ട്രെയിൻ കയറി എങ്ങോട്ടെന്നില്ലാതെ യാത്ര പോയതെന്നും ശിവരാമൻ കോടതിയെ അറിയിച്ചു. ഇതേ തുടർന്നാണ് ബന്ധുക്കൾക്കൊപ്പം വിട്ടത്. Read on deshabhimani.com