മറ്റൂർ–-തലാശേരി റോഡ് തകർന്നിട്ട് ഒരുവര്‍ഷം; കണ്ണടച്ച് പഞ്ചായത്ത്
കാലടി കാലടി പഞ്ചായത്തിലെ 14, 15 വാർഡുകളെ ബന്ധിപ്പിക്കുന്ന മറ്റൂർ-- തലാശേരി റോഡ് തകർന്നു. ശബരി റെയിൽ പാതയുടെ അടിപ്പാതമുതൽ തലാശേരി കനാൽബണ്ട് എത്തുന്നതിനുമുമ്പുള്ള പ്രദേശത്തെ റോഡ് തകർന്നിട്ട് ഒരുവർഷമായി. ഈ റോഡിലെ കുഴിയിൽ വീണ് ബൈക്ക് യാത്രികനായ മറ്റൂർ കന്നപ്പിള്ളി ബെന്നിക്ക് തലയ്‌ക്കും നട്ടെല്ലിനും ഗുരുതര പരിക്കേറ്റിരുന്നു. ഇയാള്‍ എട്ടുമാസമായി ചികിത്സയിലാണ്. കഴിഞ്ഞദിവസം ശ്രീമൂലനഗരം സ്വദേശികളായ ദമ്പതികളുടെ ഇരുചക്രവാഹനം റോഡിലെ കുഴിയില്‍ മറിഞ്ഞു. നിരവധി അപകടം ഈ റോഡിൽ സംഭവിച്ചിട്ടും യുഡിഎഫ് ഭരിക്കുന്ന കാലടി പഞ്ചായത്ത് ഭരണസമിതി അറ്റകുറ്റപ്പണിയെക്കുറിച്ച് ചിന്തിക്കുന്നില്ല. കാലടി പഞ്ചായത്ത് എത്രയുംവേഗം റോഡ് ടാർ ചെയ്യാൻ നടപടി സ്വീകരിക്കണമെന്ന് അങ്കമാലി ബ്ലോക്ക് പഞ്ചായത്ത് അംഗം സിജോ ചൊവ്വരാൻ ആവശ്യപ്പെട്ടു. Read on deshabhimani.com