ഡിജെ ഷോയിലെ ഫോൺ കവർച്ച ; പിടിയിലായവർ ബംഗളൂരു മൊബൈൽ മോഷണക്കേസ്‌ പ്രതികൾ
കൊച്ചി ബോൾഗാട്ടി പാലസിൽ അലൻ വാക്കർ ഡിജെ ഷോയ്ക്കിടെ മൊബൈൽ ഫോണുകൾ കവർന്ന കേസിൽ പിടിയിലായ മൂന്ന്‌ ഡൽഹി സ്വദേശികളെ ശനി വൈകിട്ട്‌ കൊച്ചിയിലെത്തിക്കും. അറസ്‌റ്റ്‌ രേഖപ്പെടുത്തി ഇവരെ കോടതിയിൽ ഹാജരാക്കും. ഇവർ ബംഗളൂരു ഫീനിക്‌സ്‌ മാർക്കറ്റ്‌ സിറ്റി മാളിൽ 2022ൽ നടന്ന ഡിജെ ഷോയ്ക്കിടെ മൊബൈൽ ഫോണുകൾ മോഷ്ടിച്ച കേസിലെ പ്രതികളാണെന്ന്‌ പൊലീസ്‌ പറഞ്ഞു. ബംഗളൂരു മാധേവപുര പൊലീസാണ്‌ ഇവരെ അറസ്‌റ്റ്‌ ചെയ്‌തത്‌. ബംഗളൂരുവിൽ സമാന മോഷണം നടന്ന വിവരമറിഞ്ഞാണ്‌ അന്വേഷണം ഇവരിലേക്ക്‌ എത്തിയത്‌. മാധേവപുര പൊലീസിൽനിന്ന്‌ മോഷ്ടാക്കളുടെ വിവരങ്ങൾ ലഭിച്ചു. മൂന്നുപേരും ബോൾഗാട്ടി പാലസിൽ അലൻ വാക്കർ ഷോ നടന്നപ്പോൾ കൊച്ചിയിൽ ഉണ്ടായിരുന്നതായി അവരുടെ ഫോൺ ടവർ ലൊക്കേഷനിൽനിന്ന്‌ വ്യക്തമായി. കൊച്ചി സിറ്റി പൊലീസ്‌ ഡൽഹിയിൽനിന്ന്‌ മോഷ്ടാക്കളെ പിടികൂടുകയായിരുന്നു. ഇവർ മോഷ്ടിച്ച ഇരുപതിലധികം ഫോണുകൾ കണ്ടെത്തി. മോഷ്ടാക്കളെ ചോദ്യംചെയ്‌തുവരികയാണ്‌. ബോൾഗാട്ടി പാലസിൽ ആറിന്‌ പതിനായിരത്തോളംപേർ പങ്കെടുത്ത മെഗാ ഡിജെ ഷോയ്ക്കിടെയാണ്‌ മോഷണം നടന്നത്‌. 36 ഫോണുകൾ നഷ്ടപ്പെട്ടു. 21 എണ്ണം ഐ ഫോണുകളാണ്. ഷോയിൽ മുൻനിരയിലുണ്ടായിരുന്ന വിഐപി ടിക്കറ്റ് എടുത്തവരുടെ ഫോണുകളാണ് കവർന്നത്‌. Read on deshabhimani.com