പതാക, കൊടിമര, ദീപശിഖ ജാഥകൾ ഇന്ന്‌
ശാസ്താംകോട്ട സിപിഐ എം കുന്നത്തൂർ ഏരിയ സമ്മേളനത്തിന് വെള്ളിയാഴ്ച ശാസ്താംകോട്ട ആഞ്ഞിലിമൂട്ടിൽ തുടക്കമാകുമെന്ന്‌ സംഘാടകർ വാർത്താസമ്മേളനത്തിൽ അറിയിച്ചു. സമ്മേളനത്തിനു മുന്നോടിയായുള്ള പതാക, കൊടിമര, ദീപശിഖ ജാഥകൾ വെള്ളിയാഴ്ച സമ്മേളന നഗറിൽ എത്തിച്ചേരും. കെ ബി ഓമനക്കുട്ടൻ ക്യാപ്റ്റനായ ദീപശിഖ ജാഥ വെള്ളി വൈകിട്ട് നാലിന് പള്ളിശ്ശേരിക്കൽ ആർ കൃഷ്ണകുമാറിന്റെ സ്മൃതിമണ്ഡപത്തിൽ ഏരിയ സെക്രട്ടറി ടി ആർ ശങ്കരപ്പിള്ള ഉദ്ഘാടനംചെയ്യും. സമ്മേളന നഗറിൽ എൻ യശ്പാൽ ദീപശിഖ ഏറ്റുവാങ്ങും. 4.30ന് പി ആർ അജിത് ക്യാപ്റ്റനായ പതാക ജാഥ ഭരണിക്കാവ് ഇ കാസിമിന്റെ വസതിയിൽ ജില്ലാ കമ്മിറ്റി അംഗം പി കെ ഗോപൻ ഉദ്ഘാടനംചെയ്യും. എസ് ശശികുമാർ ഏറ്റുവാങ്ങും. 5.30ന് പി ആന്റണി ക്യാപ്റ്റനായ കൊടിമര ജാഥ മനക്കര പരമേശ്വരൻ രക്തസാക്ഷി മണ്ഡപത്തിൽ ഏരിയ കമ്മിറ്റി അംഗം കെ കെ രവികുമാർ ഉദ്ഘാടനംചെയ്യും. എസ് സത്യൻ ഏറ്റുവാങ്ങും. ശനിയാഴ്‌ച പ്രതിനിധി സമ്മേളനം ശാസ്താംകോട്ട ആർ കൃഷ്ണകുമാർ നഗറിൽ (ആഞ്ഞിലിമൂട് ) സംസ്ഥാന കമ്മിറ്റി അംഗം കെ രാജഗോപാൽ ഉദ്ഘാടനംചെയ്യും. ഞായർ വൈകിട്ട് നാലിന് ശാസ്താംകോട്ടയിൽനിന്നു പ്രകടനവും ചുവപ്പുസേന മാർച്ചും നടക്കും. ആഞ്ഞിലിമൂട് എഎസ്‌വിഎൻപി നഗറിൽ ചേരുന്ന പൊതുസമ്മേളനം സംസ്ഥാന സെക്രട്ടറിയറ്റ്‌ അംഗം സജി ചെറിയാൻ ഉദ്ഘാടനംചെയ്യും. ഏരിയ സമ്മേളനത്തിന്റെ ഭാഗമായി വിവിധ വർഗബഹുജന സംഘടനകളുടെ നേതൃത്വത്തിൽ മാധ്യമ സെമിനാർ, മെഗാതിരുവാതിര, കുട്ടികൾക്കായി ക്വിസ് മത്സരം, ക്രിക്കറ്റ് ടൂർണമെന്റ് എന്നിവ സംഘടിപ്പിച്ചു. സമ്മേളനത്തിനായുള്ള ഒരുക്കങ്ങളും പൂർത്തിയായെന്ന് ഏരിയ സെക്രട്ടറി ടി ആർ ശങ്കരപ്പിള്ള, സംഘാടകസമിതി ചെയർമാൻ കെ കെ രവികുമാർ, ഇസഡ് ആന്റണി എന്നിവർ അറിയിച്ചു. Read on deshabhimani.com