പുതിയാപ്പയില്‍ ബോട്ട് റിപ്പയര്‍ യാര്‍ഡ്
കോഴിക്കോട്‌ ഏഴര കോടി രൂപ ചെലവിൽ പുതിയാപ്പയിൽ വരുന്ന മാതൃകാ മത്സ്യഗ്രാമം പദ്ധതിയുടെ ഭാഗമായി ബോട്ട് റിപ്പയർ യാർഡ് നിർമിക്കുന്നു. പദ്ധതിയുമായി ബന്ധപ്പെട്ട ആലോചനായോഗത്തിൽ മന്ത്രി എ കെ ശശീന്ദ്രനാണ്‌ ഇക്കാര്യം അറിയിച്ചത്‌. മത്സ്യത്തൊഴിലാളികളുടെ സമഗ്ര വികസനം ലക്ഷ്യമിട്ട് വിവിധ പദ്ധതികളാണ് ആവിഷ്‌കരിച്ചിട്ടുള്ളത്. ഫിഷ് കിയോസ്‌ക് കം കോൾഡ് സ്റ്റോറേജ്, വല നെയ്ത്ത് ഷെഡ് നിർമാണം, തൊഴിലാളികൾക്ക്‌ ഇ സ്‌കൂട്ടറും ഐസ് ബോക്‌സും കൃത്രിമ പാര്, സീഫുഡ് കിച്ചൺ റസ്റ്റോറന്റ്, സോളാർ ഫിഷ് ഡ്രയർ യൂണിറ്റ്, ഫിഷ് മാർക്കറ്റ് നവീകരണം, ഹൈമാസ്റ്റ് ലൈറ്റ് തുടങ്ങിയവ നടപ്പാക്കും. കേന്ദ്ര–--സംസ്ഥാന സർക്കാരുകളുടെ സഹായത്തോടെ തീരദേശ ഗ്രാമങ്ങളുടെ സമഗ്ര വികസനം ലക്ഷ്യമിട്ട് ഫിഷറീസ് വകുപ്പ് നടപ്പാക്കുന്ന പദ്ധതിയാണ് മാതൃകാ മത്സ്യഗ്രാമം. സ്റ്റാൻഡിങ്‌ കമ്മിറ്റി ചെയർപേഴ്‌സൺ ഒ പി ഷിജിന, മത്സ്യഫെഡ് സ്റ്റേറ്റ് ഡയറക്ടർ ബോർഡ് അംഗം വി കെ മോഹൻദാസ്, തഹസിൽദാർ പ്രേംലാൽ, ഫിഷറീസ് ഡെപ്യൂട്ടി ഡയറക്ടർ പി വി സതീഷൻ, കോസ്റ്റൽ ഏരിയാ ഡെവലപ്‌മെന്റ് കോർപറേഷൻ റീജണൽ മാനേജർ കെ ബി രമേശ് തുടങ്ങിയവർ പങ്കെടുത്തു. Read on deshabhimani.com