കുടിവെള്ളം വീട്ടിലെത്തിച്ച് കോർപറേഷൻ
കോഴിക്കോട് ദേശീയപാതാ വികസനത്തോടനുബന്ധിച്ച് വേങ്ങേരിയിൽ പൈപ്പ് മാറ്റി സ്ഥാപിക്കുന്നതിനെ തുടർന്ന് വീടുകളിൽ വെള്ളമെത്തിച്ച് കോർപറേഷൻ. ജപ്പാൻ കുടിവെള്ള പദ്ധതിയുടെ പമ്പിങ് നിർത്തിവച്ച സാഹചര്യത്തിലാണ് വീടുകളിൽ വെള്ളമെത്തിക്കുന്നത്. മുന്ന് മുതൽ അഞ്ച് ദിവസത്തേക്കാണ് വെള്ളം പിടിച്ചുവയ്ക്കുന്നത്. മിക്ക ദിവസങ്ങളിലും രാവിലെ ആറ് മുതൽ രാത്രി 11 വരെ വിതരണം നടക്കുന്നുണ്ട്. നഗരത്തിലെ വിവിധ ഓഫീസുകളിലും ആശുപത്രികളിലുമെല്ലാം വെള്ളമെത്തിക്കുന്നു. കോർപറേഷന്റെ കൈവശമുള്ള നാല് ലോറികൾക്കുപുറമെ വാടകയ്ക്ക് എടുത്തവയും വിതരണത്തിനായി ഉപയോഗിക്കുന്നു. ചേവായൂർ, കോതി ബീച്ച് പരിസരം തുടങ്ങിയ മേഖലകളിലാണ് വെള്ളത്തിന് ആവശ്യക്കാർ കൂടുതലെന്നും അടിയന്തരമായി വിളിക്കുന്നവർക്ക് ഉടൻ വെള്ളമെത്തിക്കുന്നതിനാണ് മുൻഗണന നൽകുന്നതെന്നും അധികൃതർ പറഞ്ഞു. പ്രവൃത്തി പൂർത്തീകരിച്ച് ശനിയാഴ്ച പമ്പിങ് പുനരാരംഭിക്കുമെന്നാണ് ജല അതോറിറ്റി അധികൃതർ അറിയിച്ചത്. പൈപ്പ് മാറ്റി സ്ഥാപിക്കുന്നതിനാൽ ശുദ്ധജലം സംഭരിച്ചുവയ്ക്കണമെന്നും അധികൃതർ നേരത്തേ അറിയിച്ചിരുന്നു. Read on deshabhimani.com