നോർക്ക ട്രിപ്പിള്‍ വിന്‍ കേരള; 528 നഴ്സുമാര്‍ക്ക് ജര്‍മ്മനിയില്‍ ജോലി
തിരുവനന്തപുരം>നോർക്ക ട്രിപ്പിൾ വിൻ കേരള പദ്ധതിയിലൂടെ മൂന്നുവർഷത്തിനിടെ ജർമ്മനിയിലെത്തിയത് 528 നഴ്സുമാർ. ജർമ്മനിയിലെ 12 സംസ്ഥാനങ്ങളിലെ വിവിധ ആരോഗ്യപരിപാലന സ്ഥാപനങ്ങളിൽ രജിസ്ട്രേഡ് നഴ്സ് തസ്തികയിലാണ് എല്ലാവർക്കും നിയമനം ലഭിച്ചത്. ഇന്ത്യയിൽ ട്രിപ്പിൾ വിൻ പദ്ധതി നടപ്പിലാക്കിയ ആദ്യ സംസ്ഥാനമാണ് കേരളം. കേരളത്തിലെ നഴ്സിങ് പ്രൊഫഷണലുകൾക്ക് ജർമ്മനിയിൽ തൊഴിലവസരമൊരുക്കുന്നതിന് നോർക്ക റൂട്ട്സും ജർമ്മൻ ഫെഡറൽ എംപ്ലോയ്മെന്റ് ഏജൻസിയും ജർമ്മൻ ഏജൻസി ഫോർ ഇന്റർനാഷണൽ കോ-ഓപ്പറേഷനും ചേർന്ന് നടപ്പാക്കുന്ന പദ്ധതിയാണ് നോർക്ക ട്രിപ്പിൾ വിൻ കേരള. 2021 ഡിസംബറിലാണ് ട്രിപ്പിൾ വിൻ കേരള പദ്ധതിയിൽ കരാറിലൊപ്പിട്ടത്. അഞ്ചുഘട്ടങ്ങളിലായി തെരഞ്ഞെടുത്ത 1400 പേരുടെ ജർമ്മൻ ഭാഷാപരിശീലനം നടപടിക്രമങ്ങൾ പൂർത്തിയായാൽ ജർമ്മനിയിലേയ്ക്ക് തിരിക്കും. ഗോയ്ഥേ സെന്ററുകളിലാണ് ബി 1 വരെയുളള ഭാഷാപരിശീലനം നൽകുന്നത്. ജർമ്മൻ ഓണററി കോൺസലിന്റെ നേതൃത്വത്തിൽ ട്രിപ്പിൾ വിൻ പദ്ധതിയുടെ 500 പ്ലസ് ആഘോഷവും ജർമ്മൻ ഐക്യദിനത്തിനും ബെർലിൻ മതിൽ പതനത്തിന്റെ 35-ാം വാർഷികാഘോഷവും സംഘടിപ്പിച്ചു. തിരുവനന്തപുരം ഗ്രാന്റ് ഹയാത്ത് ഹോട്ടലിൽ നടന്ന ചടങ്ങിൽ ബംഗലൂരുവിലെ ജർമ്മൻ കോൺസൽ ജനറൽ അച്ചിം ബുകാർട്ട് മുഖ്യാതിഥിയായി. നോർക്ക റൂട്ട്സിന്റെ മികച്ച പിന്തുണയാണ് പദ്ധതിയുടെ വിജയത്തിന് പിന്നിലെന്ന് അദ്ദേഹം പറഞ്ഞു. മികച്ച നേട്ടം കൈവരിക്കാനായതിൽ അഭിമാനമുണ്ടെന്നും ഗോയ്ഥേ സെന്ററിന്റെ പ്രവർത്തനം അഭിനന്ദനാർഹമാണെന്നും നോർക്ക റൂട്ട്സ് റസിഡന്റ് വൈസ് ചെയർമാൻ പി ശ്രീരാമകൃഷ്ണൻ പറഞ്ഞു. നോർക്ക റൂട്ട്സ് സിഇഒ അജിത് കോളശ്ശേരി, ഗോയ്ഥേ സെന്റർ ചെയർപേഴ്സൺ ജി വിജയരാഘവൻ, ജർമ്മനിയുടെ കേരളത്തിലെ ഹോണററി കോൺസൽ ഡോ. സയിദ് ഇബ്രാഹിം എന്നിവർ സംസാരിച്ചു. ജർമ്മൻ ബാന്റായ അലാംടോ സംഗീതവിരുന്നും നടത്തി. Read on deshabhimani.com