കർണാടകം ട്രാൻസ്പോർട്ട് ബസിനുനേരെ പാഞ്ഞടുത്ത് കാട്ടാന
ബത്തേരി വനപാതയിൽ കർണാടകം സ്റ്റേറ്റ് ട്രാൻസ്പോർട്ട് ബസിനുനേരെ പാഞ്ഞടുത്ത് കാട്ടാന. ഞായർ രാവിലെ 8.30ഓടെ ബത്തേരി–-ഗുണ്ടൽപേട്ട് റൂട്ടിൽ മൂലഹള്ളയ്ക്ക് സമീപമാണ് സംഭവം. ബസിലെ യാത്രക്കാരനായ നായ്ക്കട്ടി സ്വദേശി ആഷിഖ് മൊബൈലിൽ പകർത്തിയ ദൃശ്യം സമൂഹ മാധ്യമങ്ങളിൽ വൈറലായി. റോഡിലൂടെ പോയ ലോറിക്ക് നേരെയാണ് കാട്ടാന ആദ്യം പാഞ്ഞടുത്തത്. ആനയെ വെട്ടിച്ച് ലോറി കടന്നുപോയി. തൊട്ടുപിന്നാലെയുള്ള ഇരുചക്ര വാഹനത്തിലെ യാത്രികരും ചെറിയ പിക്കപ്പ് വാഹനവും റോഡ് അരികിലൂടെ രക്ഷപ്പെട്ടു. തുടർന്നാണ് പുറകിലുള്ള സ്റ്റേറ്റ് ബസിന് നേരെ ആന വന്നത്. കൂടെയുണ്ടായിരുന്ന കാട്ടാനക്കുട്ടി വനഭാഗത്തേക്ക് ഓടിപ്പോയി. ഡ്രൈവർ സീറ്റിന്റെ ഉള്ളിലേക്ക് ആന തുമ്പിക്കൈ നീട്ടി പരതി. ഭയന്ന യാത്രക്കാർ സീറ്റുകളിൽനിന്ന്‌ മാറി മറുവശത്തേക്ക് പോയി. യാത്രക്കാർ സൈഡ് ചില്ല് തുറന്ന് റോഡിലേക്ക് പഴവർഗങ്ങൾ ഇട്ടുകൊടുത്താണ് ആനയെ പിന്തിരിപ്പിച്ചത്. Read on deshabhimani.com