അന്ധവിശ്വാസങ്ങള്‍ പ്രചരിപ്പിക്കാൻ ചിലർ ശാസ്ത്രസ്ഥാപനങ്ങളെ ഉപയോഗിക്കുന്നു: മുഖ്യമന്ത്രി
ആലപ്പുഴ ഭരണഘടനാസ്ഥാനങ്ങളിൽ ഇരിക്കുന്നവർ തന്നെ അന്ധവിശ്വാസങ്ങളും അനാചാരങ്ങളും പ്രചരിപ്പിക്കാൻ ശ്രമിക്കുമ്പോൾ വിദ്യാർഥികളിൽ ശാസ്ത്രാവബോധം വളർത്തുന്നതിന്‌ നിർണായക പങ്കുവഹിക്കാൻ ശാസ്ത്രോത്സവങ്ങൾക്കാകണമെന്ന്‌ മുഖ്യമന്ത്രി പിണറായി വിജയൻ. 56–-ാമത്‌ കേരള സ്‌കൂൾ ശാസ്‌ത്രോത്സവം, വൊക്കേഷണൽ എക്‌സ്‌പോ ആൻഡ് കരിയർ ഫെസ്റ്റ്‌ ഉദ്‌ഘാടനം ചെയ്യുകയായിരുന്നു അദ്ദേഹം. അന്ധവിശ്വാസങ്ങൾക്കും അനാചാരങ്ങൾക്കും അശാസ്ത്രീയതയ്ക്കും മേൽക്കൈ ഉണ്ടാക്കാൻ ചില ശക്തികൾ കിണഞ്ഞു പരിശ്രമിക്കുകയാണ്. ശാസ്ത്രസ്ഥാപനങ്ങളെപ്പോലും തെറ്റായ രീതിയിൽ ഉപയോഗിച്ചുകൊണ്ടാണിത്‌ ചെയ്യുന്നത്‌. ഒരുവശത്ത്, അശാസ്ത്രീയതകളെ ശാസ്ത്രീയ സത്യങ്ങളായി പാഠപുസ്തകങ്ങളിൽ ഉൾപ്പെടുത്തുകയും മറുവശത്ത്, പരിണാമസിദ്ധാന്തം അടക്കമുള്ളവയെ പുസ്തകങ്ങളിൽനിന്ന്‌ ഒഴിവാക്കുകയുമാണ്‌ ഇക്കൂട്ടർ. അതിനാൽ, വർഷംതോറും നടത്തുന്ന മത്സരങ്ങൾ എന്നതിലുപരി സാമൂഹ്യപുരോഗതിക്കായി ശാസ്‌ത്രബോധം സൃഷ്‌ടിക്കുന്ന ഇടമായി ശാസ്‌ത്രോത്സവം മാറണം. ശാസ്ത്രബോധത്തിന്‌ ഇടമില്ലാതിരുന്ന കാലത്ത്‌ നവോത്ഥാന, പുരോഗമന പ്രസ്ഥാനങ്ങളാണ് മനുഷ്യരെ ശാസ്ത്രചിന്തയിലേക്കു കൈപിടിച്ചുയർത്തിയത്. ആ പുരോഗതി നിലനിർത്താനാണ്‌ സംസ്ഥാന സർക്കാർ ശ്രമിക്കുന്നത്‌. ശാസ്ത്രമുൾപ്പെടെ ഏതു മേഖലയിലും മുന്നോട്ടു പോകണമെങ്കിൽ മികച്ച ഗവേഷണങ്ങൾ നടക്കേണ്ടതുണ്ട്. രാജ്യത്ത്‌ ആകെ ആഭ്യന്തര ഉൽപ്പാദനത്തിന്റെ 0.7 ശതമാനം മാത്രമാണ് ഗവേഷണത്തിനായി ചെലവഴിക്കുന്നത്. എന്നാൽ കേരളം വേറിട്ടു നിൽക്കുകയാണ്‌. സംസ്ഥാന ബജറ്റിൽ 3,500 കോടി രൂപയുടെ പ്രത്യേക റിസർച്ച് ആൻഡ് ഡെവലപ്‌മെന്റ്‌ ബജറ്റ് മുന്നോട്ടുവച്ചു. ഗവേഷണഫലത്തിലെ അറിവുകൾ പൊതുസമൂഹത്തിന് ഉപകരിക്കുന്ന ഉൽപ്പന്നങ്ങളും സേവനങ്ങളുമായി പരിവർത്തനം ചെയ്യുന്നതിന്‌ ട്രാൻസ്‌ലേഷണൽ റിസർച്ച് ലാബുകളും രൂപീകരിച്ചു. 10 സർവകലാശാലകളിലായി 200 കോടി രൂപ മുതൽമുടക്കിലാണ് ഇവ ഒരുക്കുന്നത്. ലോകത്തുണ്ടാകുന്ന ഏതു വിജ്ഞാനത്തെയും കേരളത്തിൽ നിന്നുകൊണ്ടുതന്നെ സ്വാംശീകരിക്കാൻ കഴിയണമെന്നാണ്‌ സർക്കാർ ലക്ഷ്യമിടുന്നത്‌. അതിനോടൊപ്പം തദ്ദേശീയമായ ജ്ഞാനോൽപാദനവും വേണം. അതിന്‌ സഹായകരമാകുന്ന തരത്തിൽ സംസ്ഥാനത്തെ വൈജ്ഞാനിക സമൂഹമാക്കി മാറ്റും. ശാസ്ത്രഗവേഷണങ്ങൾ മനുഷ്യന്റെ നല്ല ഭാവിക്ക്‌ ഉപയോഗിക്കുന്നതിനോടൊപ്പം ലോകത്തിന്റെ ഹരിത ഭാവി കൂടി ലക്ഷ്യമിടുന്നതായിരിക്കണം. അതിനുതകുന്ന ചർച്ചകൾ ശാസ്ത്രോത്സവങ്ങളുടെ ഭാഗമായി ഉയർന്നുവരണമെന്നും മുഖ്യമന്ത്രി പറഞ്ഞു. സയൻസിനെ വണങ്ങി മുഖ്യമന്ത്രി ‘കോടി സൂര്യനുദിച്ചാലു–- മൊഴിയാത്തൊരു കൂരിരുൾ തുരന്നു സത്യം കാണിക്കും സയൻസിന്നു തൊഴുന്നു ഞാൻ’ സഹോദരൻ അയ്യപ്പൻ 1916ലെഴുതിയ സയൻസ്‌ ദശകത്തിന്റെ ആദ്യ നാലുവരി ചൊല്ലിക്കൊണ്ടാണ്‌ 56–-ാമത്‌ കേരള സ്‌കൂൾ ശാസ്‌ത്രോത്സവം മുഖ്യമന്ത്രി ഉദ്‌ഘാടനം ചെയ്തത്‌. പുത്തൻപരീക്ഷണങ്ങളുമായി എത്തുന്ന കുട്ടിശാസ്‌ത്രജ്ഞരുടെയും അവരെ അറിവിന്റെ ലോകത്തേക്ക്‌ കൈപിടിച്ചു നടത്തുന്ന അധ്യാപകരുടെയും നിറഞ്ഞ കൈയടിയായിരുന്നു മുഖ്യമന്ത്രിക്ക്‌ മറുപടി. ശാസ്‌ത്രഅവബോധത്തിന്‌ അധ്യാപകരുടെ പങ്ക്‌ വലുതാണ്‌. തന്റെ സ്‌കൂൾ കാലഘട്ടത്തിലെ ഓർമ മുഖ്യമന്ത്രി പങ്കുവച്ചു. വസൂരി ദൈവകോപമാണെന്നും വസൂരി വിത്തുകൾ എറിഞ്ഞാൽ രോഗം വരുമെന്നും അന്ധവിശ്വാസങ്ങൾ പ്രചരിപ്പിച്ച കാലത്ത്‌ അതിനെ തച്ചുടച്ച ഒരു മലയാളം അധ്യാപകൻ തനിക്കുണ്ടായിരുന്നു. അന്ധവിശ്വാസങ്ങളും അസത്യങ്ങളും പ്രചരിക്കുന്ന ഇക്കാലത്ത്‌ ഇവയെ ചോദ്യം ചെയ്യുന്ന അധ്യാപകർ ആവശ്യമാണ്‌. അസത്യങ്ങൾ പ്രചരിപ്പിക്കുന്നതിൽനിന്ന്‌ അധ്യാപകർ പിന്തിരിയണമെന്നും മുഖ്യമന്ത്രി പറഞ്ഞു. Read on deshabhimani.com