നീതിദേവതയുടെ പ്രതിമയിലെ മാറ്റം; അതൃപ്തി അറിയിച്ച് സുപ്രീംകോടതി ബാർ അസോസിയേഷൻ
ന്യൂഡൽഹി > നീതിദേവതയുടെ പ്രതിമയിൽ വരുത്താൻ തീരുമാനിച്ച മാറ്റങ്ങളിൽ അതൃപ്തി പ്രകടിപ്പിച്ച് സുപ്രീംകോടതി ബാർ അസോസിയേഷൻ. ബാർ അസോസിയേഷൻ അംഗങ്ങളുമായി കൂടിയാലോചന നടത്താതെയാണ് തീരുമാനമെടുത്തതെന്ന് അസോസിയേഷൻ അറിയിച്ചു. ഇത് സംബന്ധിച്ച പ്രമേയവും ബാർ അസോസിയേഷൻ പാസാക്കി. ഏകപക്ഷീയമായാണ് പ്രതിമയിൽ മാറ്റം വരുത്തിയതെന്നും തങ്ങളെ അറിയിച്ചിച്ചില്ലെന്നും പ്രമേയത്തിൽ പറയുന്നു. കണ്ണ് മൂടിക്കെട്ടിയുള്ള പ്രതിമയെമാറ്റി പകരം കണ്ണു തുറന്നു നിൽക്കുന്ന പ്രതിമയെയാണ് പുതിയതായി രൂപകൽപന ചെയ്തത്. വാളിനു പകരം കയ്യിൽ ഭരണഘടനയാണുള്ളത്. വാൾ ശിക്ഷയുടെ പ്രതീകമല്ല എന്ന സന്ദേശം നൽകാനാണ് വാൾ മാറ്റി പകരം ഭരണഘടനയാക്കിയത്. നിയമത്തിന് മുന്നിൽ സമത്വത്തെ പ്രതിനിധീകരിക്കുക എന്ന ആശയത്തിലാണ്‌ നീതി ദേവതയുടെ കണ്ണുകൾ മൂടിയിരുന്നത്‌. കോടതികൾക്ക് മുന്നിൽ പ്രത്യക്ഷപ്പെടുന്നവരുടെ സമ്പത്ത്, അധികാരം അല്ലെങ്കിൽ മറ്റ് പദവികൾ തുടങ്ങിയക്കുമുന്നിൽ നീതി നിഷേധിക്കപ്പെടരുത്‌ എന്നതായിരുന്നു അടഞ്ഞ കണ്ണുകൾ അർത്ഥമാക്കിയിരുന്നത്‌. വാൾ അനീതിക്കെതിരെ, ശിക്ഷിക്കാനുള്ള പ്രതീകമായിരുന്നു. നിയമം ഒരിക്കലും അന്ധമല്ലെന്നും നിയമത്തിനു മുമ്പിൽ എല്ലാവരും തുല്ല്യരാണ്‌ എന്നുമുള്ളള സന്ദേശമാണ്‌ പ്രതമയിലെ മാറ്റങ്ങൾക്കൊണ്ട്‌ അർത്ഥമാക്കുന്നതെന്നായിരുന്നു രൂപമാറ്റത്തിൽ ചീഫ് ജസ്റ്റിസ് ഓഫീസിന്റെ പ്രതികരണം. Read on deshabhimani.com