ബൈജൂസിന്‌ തിരിച്ചടി: പാപ്പർനടപടികൾ പിൻവലിച്ച ഉത്തരവ്‌ റദ്ദാക്കി സുപ്രീംകോടതി
ന്യൂഡൽഹി എഡ്യുടെക്ക്‌ കമ്പനി ബൈജൂസിന്‌ എതിരായ പാപ്പർ നടപടികൾ പിൻവലിച്ച ദേശീയ കമ്പനി നിയമ അപ്പലറ്റ്‌ ട്രിബ്യൂണൽ (എൻസിഎൽഎടി) ഉത്തരവ്‌ റദ്ദാക്കി സുപ്രീംകോടതി. ബിസിസിഐയും ബൈജൂസിന്റെ മാതൃകമ്പനി ‘തിങ്ക്‌ ആൻഡ്‌ ലേണും’ തമ്മിലുണ്ടാക്കിയ ഒത്തുതീർപ്പിന്റെ അടിസ്ഥാനത്തിൽ പാപ്പർ നടപടികൾ പിൻവലിച്ച കമ്പനി നിയമ ട്രൈബ്യൂണൽ ഉത്തരവ്‌ ചീഫ്‌ ജസ്റ്റിസ് ഡി വൈ ചന്ദ്രചൂഡ്‌ അധ്യക്ഷനായ ബെഞ്ചാണ്‌ റദ്ദാക്കിയത്‌. അമേരിക്കൻ വായ്‌പദാതാക്കളായ ‘ഗ്ലാസ്‌ട്രസ്റ്റ്‌’ കമ്പനിയുടെ അപ്പീൽ പരിഗണിച്ചാണ്‌ സുപ്രീംകോടതിയുടെ ഇടപെടൽ. ഇന്ത്യൻ ക്രിക്കറ്റ്‌ ടീമിന്റെ ജേഴ്‌സി സ്‌പോൺസർ ചെയ്‌ത വകയിൽ 158 കോടി നൽകിയാണ്‌ ബൈജൂസ്‌ ബിസിസിഐയുമായി ഒത്തുതീർപ്പുണ്ടാക്കിയത്‌. ഈ ഒത്തുതീർപ്പിന്റെ അടിസ്ഥാനത്തിൽ കമ്പനി നിയമ ട്രൈബ്യൂണൽ ബൈജൂസിന്‌ എതിരായ പാപ്പർനടപടികൾ പിൻവലിച്ചു. എന്നാൽ, പാപ്പർ നിയമങ്ങൾ പാലിക്കാതെയാണ്‌ ബൈജൂസിന്‌ എതിരായ പാപ്പർ നടപടികൾ പിൻവലിച്ചതെന്ന്‌ സുപ്രീംകോടതി വിമർശിച്ചു. കക്ഷികൾ തമ്മിൽ ഒത്തുതീർപ്പുണ്ടാക്കിയശേഷം ട്രൈബ്യൂണലിനെ സമീപിച്ച്‌ ആ ഒത്തുതീർപ്പിന്‌ അംഗീകാരം വാങ്ങുന്നത്‌ ശരിയായ നടപടിയല്ലെന്നും കോടതി ചൂണ്ടിക്കാട്ടി. ഒത്തുതീർപ്പിന്‌ അംഗീകാരം നൽകുന്നതിന്‌ പകരം ട്രൈബ്യൂണൽ, പാപ്പർ നിയമം അനുസരിച്ച്‌ ‘കമ്മിറ്റി ഓഫ്‌ ക്രെഡിറ്റേഴ്‌സ്‌’ (സിഒസി) രൂപീകരിക്കണമായിരുന്നു. പാപ്പർനടപടികൾ പിൻവലിക്കാൻ കമ്പനികൾക്ക്‌ നേരിട്ട്‌ അപേക്ഷിക്കാൻ കഴിയില്ലെന്നും സുപ്രീംകോടതി പറഞ്ഞു. ബൈജൂസ്‌ ബിസിസിഐക്ക്‌ കൈമാറിയ 158 കോടി പ്രത്യേക അക്കൗണ്ടിൽ സൂക്ഷിക്കാൻ കോടതി നേരത്തെ നിർദേശം നൽകിയിരുന്നു. ഈ തുക കമ്മിറ്റി ഓഫ്‌ ക്രെഡിറ്റേഴ്‌സിന്റെ (സിഒസി) അക്കൗണ്ടിലേക്ക്‌ മാറ്റാനും സുപ്രീംകോടതി ഉത്തരവിട്ടു. പാപ്പർ നടപടികൾ അവസാനിപ്പിച്ച ട്രൈബ്യൂണൽ ഉത്തരവോടെ ബൈജൂസ്‌ സ്ഥാപകൻ ബൈജു രവീന്ദ്രന്‌ കമ്പനിയുടെ ഭാഗിക നിയന്ത്രണം തിരിച്ചുകിട്ടിയിരുന്നു. Read on deshabhimani.com