7.6 കോടി രൂപയുടെ സ്വർണവുമായി രണ്ട് പേർ മുംബൈ എയർപോർട്ടിൽ പിടിയിൽ
മുംബൈ > 7.6 കോടി രൂപയുടെ സ്വർണവുമായി രണ്ട് പേർ മുംബൈ എയർപോർട്ടിൽ പിടിയിൽ. 9.4 കിലോ സ്വർണമാണ് ഇവരിൽ നിന്നും ഡയറക്ട്രേറ്റ് ഓഫ് റവന്യൂ ഇന്റലിജെൻസ് (ഡിആർഐ) പിടികൂടിയത്. ജയ്പൂരിൽ നിന്നും മുംബൈയിലേക്കുള്ള വിമാനത്തിൽ വ്യജ ഐഡന്റിറ്റി ഉപയോഗിച്ച് യാത്ര ചെയ്ത ഇവരെ മുംബൈ എയർപ്പോർട്ടിൽവച്ച് പിടികൂടുകയായിരുന്നു. തുടർന്ന് നടത്തിയ പരിശോധനയിൽ ഇവരുടെ ബാഗിൽ നിന്നും മൂന്ന് പായ്ക്കറ്റുകളിലായി ഒളിപ്പിച്ച 9.487 കിലോ സ്വർണം കണ്ടെത്തിയത്. സ്വർണം വിദേശത്തുനിന്നും കടത്തിയതാണെന്ന് പ്രതികൾ പറഞ്ഞതായി ഡിആർഐ അറിയിച്ചു. കൂടുതൽ അന്വേഷണം നടക്കുന്നതായും സംഭവത്തിൽ ഉൾപ്പെട്ട മറ്റ് ആളുകളെ കണ്ടെത്താനുള്ള അന്വേഷണം പുരോഗമിക്കുകയാണെന്നും ഡിആർഐ പറഞ്ഞു. Read on deshabhimani.com