ദുബായ് എമിറേറ്റിലെ ഇന്റേണൽ റോഡുകളുടെ പഞ്ചവത്സര പദ്ധതിക്ക് അംഗീകാരം
ദുബായ് > ദുബായ് എമിറേറ്റിലെ ഇന്റേണൽ റോഡുകളുടെ പഞ്ചവത്സര പദ്ധതിക്ക് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം അംഗീകാരം നൽകി. 12 പാർപ്പിട, വാണിജ്യ, വ്യാവസായിക മേഖലകളിലായി വ്യാപിച്ചുകിടക്കുന്ന 21 പദ്ധതികൾ ഈ പദ്ധതി ഉൾക്കൊള്ളുന്നു, മൊത്തം 634 കിലോമീറ്റർ പുതിയ റോഡുകൾക്ക് 3.7 ബില്യൺ ദിർഹം ചെലവ് വരും. 30 ശതമാനം മുതൽ 80 ശതമാനം വരെയുള്ള നഗരവൽക്കരണ നിരക്കുകളുള്ള 12 മേഖലകളാണ് പഞ്ചവത്സര ആഭ്യന്തര റോഡ് വികസന പദ്ധതിയിൽ ഉൾപ്പെടുന്നതെന്ന് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി എക്‌സിക്യൂട്ടീവ് ഡയറക്‌ടേഴ്‌സ് ബോർഡ് ചെയർമാൻ മത്തർ അൽ തായർ പറഞ്ഞു. 2023-ലും 2024-ലും ആർടിഎ 17 മേഖലകളിലായി 83 കിലോമീറ്റർ ദൈർഘ്യമുള്ള ആന്തരിക റോഡുകൾ നിർമ്മിച്ചു. അൽ വർഖ 4, അൽ ഖുസൈസ് ഇൻഡസ്ട്രിയൽ, മാർഗം, ലെഹ്ബാബ്, അൽ ലിസൈലി, ഹത്ത (സുഹൈല, സൈർ, അൽ സലാമി) എന്നിവിടങ്ങളിൽ റോഡ് പദ്ധതികൾ പൂർത്തിയാക്കി. ജബൽ അലി ഇൻഡസ്ട്രിയൽ, നസ്‌വ, അൽ ഖവാനീജ് 2 ലെ ടോളറൻസ് ഡിസ്ട്രിക്റ്റ്, അൽ വർഖ, നാദ് അൽ ഷെബ 1, അൽ അവീർ എന്നിവിടങ്ങളിൽ പദ്ധതികൾ തുടരുകയാണ്. Read on deshabhimani.com