സാംസങ് ആയിരത്തോളം തൊഴിലാളികളെ പിരിച്ചുവിടുന്നതായി റിപ്പോര്‍ട്ട്
സിയോൾ > കൂട്ട പിരിച്ചുവിടൽ നടത്താനൊരുങ്ങി ടെക് ഭീമൻ സാംസങ്. തെക്ക്-കിഴക്കൻ ഏഷ്യ, ആസ്ട്രേലിയ, ന്യൂസീലാൻഡ് എന്നിവിടങ്ങളിലെ ആയിരത്തോളം തൊഴിലാളികളെ പിരിച്ചുവിടാൻ സാംസങ് തയാറെടുക്കുന്നതായി ബ്ലൂംബെർഗ് റിപ്പോർട്ട് ചെയ്തു. ഈ രാജ്യങ്ങളിലെ പത്ത് ശതമാനം തൊഴിലാളികളെ കൂട്ടപിരിച്ചുവിടൽ ബാധിക്കുമെന്നാണ് കണക്കാക്കുന്നത്. സൗത്ത് കൊറിയ ആസ്ഥാനമായുള്ള സാംസങ് ഇലക്ട്രോണിക്സ് കമ്പനിയിൽ ആഗോളതലത്തിൽ 267,800 തൊഴിലാളികൾ ജോലി ചെയ്യുന്നുണ്ട്. ഇതിൽ 147,000 തൊഴിലാളികൾ സൗത്ത് കൊറിയയ്ക്ക് പുറത്ത് ജോല് ചെയ്യുന്നവരാണ്. സൗത്ത് കൊറിയയിൽ ഉടനെ പിരിച്ചുവിടൽ നടപടികൾ ഉണ്ടാകില്ലെന്നാണ് റിപ്പോർട്ടുകൾ. ഈ വർഷം സ്റ്റോക്ക് മാർക്കറ്റിൽ സാംസങിന് 20 ശതമാനം ഇടിവുണ്ടായി. കമ്പനി നിർമിക്കുന്ന സ്മാർട്ഫോണുകൾക്കും ചിപ്പുകൾക്കും ഉപഭോഗം കുറ‍ഞ്ഞു. ആപ്പിൾ, മൈക്രോസോഫ്റ്റ്, ഗൂഗിൾ തുടങ്ങിയ കമ്പനികളും കൂട്ടപിരിച്ചുവിടൽ നടത്തിയിട്ടുണ്ട്. ചെലവ് ചുരുക്കൽ, എഐ പോലെയുള്ള പുതിയ സാങ്കേതികവിദ്യകളിലേക്കുള്ള മാറ്റം എന്നിവയൊക്കെയാണ് ടെക് കമ്പനികളിലെ കൂട്ടപിരിച്ചുവിടലുകൾക്ക് പിന്നിലെന്നാണ് റിപ്പോർട്ടുകൾ സൂചിപ്പിക്കുന്നത്. ഈ വർഷം ആഗസ്ത് 30 വരെ മാത്രെ 422 കമ്പനികളിൽ നിന്നായി 136,782 തൊഴിലാളികളെ പിരിച്ചുവിട്ടുവെന്നാണ് കണക്ക്. Read on deshabhimani.com