മലയാളികൾക്കിടയിൽ ഏറെ ആരാധകരുള്ള കൊറിയൻ- അമേരിക്കൻ താരമാണ് ഡോൺ ലീ എന്നറിയപ്പെടുന്ന മാ ഡോങ്-സിയോക്ക്. കൊറിയൻ ലാലേട്ടൻ എന്ന് മലയാളി ആരാധകർ വിളിക്കുന്ന ഡോൺ ലീയുടെ ഇൻസ്റ്റഗ്രാം സ്റ്റോറിയാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. പ്രഭാസ്- പ്രശാന്ത് നീൽ ചിത്രം സലാറിന്റെ രണ്ടാം ഭാഗത്തിന്റെ പോസ്റ്ററാണ് താരം ഇൻസ്റ്റഗ്രാം സ്റ്റോറിയായി പങ്കുവച്ചത്. ചിത്രത്തിന് ആശംസയറിയിച്ചുകൊണ്ടുള്ള ഡോൺ ലീയുടെ സ്റ്റോറി നിമിഷനേരങ്ങൾക്കുള്ളിൽ വൈറലായി.
ഇതോടെ ചിത്രത്തിൽ ഡോൺ ലീയും പ്രത്യക്ഷപ്പെടുന്നുണ്ടെന്നാണ് സ്ഥിരീകരിക്കാത്ത വാർത്തകൾ പുറത്തുവരുന്നത്. ദേശീയ മാധ്യമങ്ങളടക്കം ഡോൺ ലീ തെലുഗിലൂടെ ഇന്ത്യൻ സിനിമയിലേക്ക് രംഗപ്രവേശം ചെയ്യുന്നതിനെപ്പറ്റി റിപ്പോർട്ട് ചെയ്യുന്നുണ്ട്. മുമ്പ് സന്ദീപ് റെഡ്ഡി വംഗയുടെ സ്പിരിറ്റിൽ ഡോൺ ലീ വില്ലനായെത്തുമെന്ന് റിപ്പോർട്ടുകളുണ്ടായിരുന്നു. ഇതിന്റെ നിരവധി ഫാൻ മെയ്ഡ് പോസ്റ്ററുകളും വീഡിയോകളും പുറത്തുവന്നിരുന്നു. മോഹൻലാൽ - പൃഥ്വിരാജ് ചിത്രം എമ്പുരാനിലും ഡോൺ ലീ എത്തുമെന്ന് അഭ്യൂഹങ്ങളുണ്ടായിരുന്നു. ഇതിനു പിന്നാലെയാണ് ഡോൺ ലീ തന്നെ ഒരു ഇന്ത്യൻ ചിത്രത്തിന്റെ പോസ്റ്റർ പങ്കുവച്ചത്. ഇൻസ്റ്റഗ്രാം സ്റ്റോറി നിറയെ പ്രഭാസ് ആരാധകരുടെ ആവേശമാണ്.
ട്രെയിൻ ടു ബുസാൻ, അൺസ്റ്റോപ്പബിൾ, ദ ഗ്യാങ്സ്റ്റർ ഗ കോപ് ദ ഡെവിൾ, എറ്റേണൽസ് എന്നിവ ഡോൺ ലീയുടെ ശ്രദ്ധേയമായ ചിത്രങ്ങളാണ്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
