നരേന്ദ്ര ഭായ് മഹാത്മജിക്ക് തുല്യനാണ് എന്നു പറഞ്ഞത് അനിൽ അംബാനിയാണ്‌. നരേന്ദ്ര മോഡിയുമായുള്ള വ്യക്തിപരമായ അടുപ്പംതന്നെ മഹാഭാഗ്യം ആണെന്നും രണ്ടുവർഷംമുമ്പ് അനിൽ അംബാനി എഴുതിവച്ചു. അവർ തമ്മിലുള്ളത് ചെറിയ ബന്ധമല്ല പിതാവ് ധീരുഭായ് ക്ഷണിച്ച‌് വീട്ടിലെത്തിച്ച് നരേന്ദ്ര ഭായിക്ക് വിരുന്നു നൽകിയ അന്ന് തുടങ്ങിയ ബന്ധമാണ്. കണ്ണുകൾ തുറന്ന് അർജുനനെപ്പോലെ ലക്ഷ്യബോധത്തോടെയും വ്യക്തതയോടെയും സ്വപ്നംകാണുന്ന ആളാണ് മോഡിയെന്ന‌് ഇളയ മകനോട് പറഞ്ഞു ധീരുഭായി. അനിലിന് അന്ന് കൗമാരപ്രായം. രാജ്യത്തിന്റെ ഉയരങ്ങളിൽ നരേന്ദ്ര ഭായ് എത്തുമെന്നും പ്രധാനമന്ത്രിയാകുമെന്നും അച്ഛൻ പറഞ്ഞത് സത്യം ആയല്ലോ എന്ന ആശ്വാസത്തിലാണ് ഇന്ന് ഷഷ്ടിപൂർത്തിയിലേക്ക് അടുക്കുന്ന അനിൽ അംബാനി. അച്ഛന്റെ സ്വപ്നം ഫലിച്ചതിൽ മാത്രമല്ല ആഹ്ലാദം. അച്ഛൻ തനിക്ക് പരിചയപ്പെടുത്തിയ രക്ഷകൻ ഓരോ പതനത്തിലും തന്നെ താങ്ങിനിർത്തുമ്പോൾ സ്നേഹിക്കുകയും ബഹുമാനിക്കുകയും ചെയ്യുന്നത് കേവലമായ നന്ദി പ്രകടനംമാത്രം. അതുകൊണ്ട് ഒരു തർക്കവുമില്ല നരേന്ദ്ര മോഡി അനിൽ അംബാനിക്ക് ദൈവതുല്യനാണ്. ധീരുഭായ് ഉറ്റ സുഹൃത്തായതുകൊണ്ട് അദ്ദേഹത്തിന്റെ കാലശേഷം മക്കളെ പൊന്നുപോലെ നോക്കാനുള്ള ചുമതലയാണ് നരേന്ദ്ര ഭായ് ഏറ്റെടുത്തത്. മുകേഷിനെ സഹായിക്കാനും കാലിടറുമ്പോൾ അനിലിന് താങ്ങായി നിൽക്കാനും നരേന്ദ്ര ഭായ് അല്ലാതെ മറ്റാരുണ്ട്. സുഹൃത്തുക്കൾക്കുവേണ്ടിയും സ്വന്തക്കാർക്കുവേണ്ടിയും ആരും ചെയ്യാത്തത് ചെയ്യാൻ കഴിയുന്നു എന്നതാണ് നരേന്ദ്ര മോഡിയുടെ 56 ഇഞ്ച് മഹത്വം. അനിൽ അംബാനി തകർന്ന് ദീവാളി കുളിച്ച സമയത്ത് പാരീസിൽ കൊണ്ടുപോയി ഒരു വിമാനക്കരാർ ഒപ്പിച്ചുകൊടുത്ത് ഒരു കൊച്ചു കമ്പനി ഉണ്ടാക്കി ആ കമ്പനിക്ക് കരാർ നൽകി സംരക്ഷിക്കുക എന്ന് പറയുന്നത് ഏതു ത്യാഗിയിലും കാണാത്ത മഹത്വം... രാഷ്ട്രീയ സ്വയംസേവക കുടുംബത്തിൽ പിറന്നവർക്കുമാത്രമേ ഇങ്ങനെ സഹായിക്കാനാകൂ. അനിൽ അംബാനിയുടെ ഗ്രൂപ്പിന് ഇന്ത്യാ ഗവൺമെന്റ‌് ശുപാർശ ചെയ്തപ്പോൾ വളരെ സന്തോഷത്തോടെയും മറ്റു വഴികൾ ഇല്ലാത്തതുകൊണ്ടും തങ്ങൾ സ്വീകരിച്ചു എന്നാണ് അന്നത്തെ ഫ്രഞ്ച് പ്രസിഡന്റ‌് ഫ്രാൻസ്വ ഓളന്ദ് പറഞ്ഞത്. അതാണ് ഇന്ത്യയിൽ ജനിച്ച സംഘപുത്രന്റെ രാജ്യസ്നേഹം.
.jpg)
രാജ്യം നാളെ ഭരിക്കേണ്ട കുടുംബമാണ്. ഒട്ടുമിക്ക മേഖലകളിലും മുകേഷ് പിടിമുറുക്കിക്കഴിഞ്ഞു. അനിലിനും കുഴപ്പം ഉണ്ടാകരുത്. ധീരുഭായ് ജനിച്ചത് ദാരിദ്ര്യത്തിൽ ആയിരുന്നെങ്കിലും അനിൽ അംബാനിയുടെ ജനനം സമൃദ്ധിയുടെ നടുമുറ്റത്ത് വജ്രം പതിപ്പിച്ച വെള്ളിക്കരണ്ടിയുമായി ആയിരുന്നു. അമ്പിളിമാമനെ എത്തിപ്പിടിക്കാൻ മുകേഷ് അംബാനി ആകാശം തൊടുന്ന വീട് വച്ചെങ്കിൽ അനിൽ അംബാനിക്ക് ഇടയ്ക്ക് പല പല തട്ടുകേടുകൾ പറ്റി. ഭാഗംവച്ച് കിട്ടിയ കച്ചവടമൊന്നും മുന്നോട്ടുപോയില്ല. ടെലികോംരംഗത്ത് മലപോലെ വന്ന് എലിപോലെ പോയപ്പോൾ പിന്നാലെ എത്തിയ സഹോദരൻ ആ ബിസിനസുതന്നെ വിഴുങ്ങി. റിലയൻസ്‌ ഫോണിനെ വാരിപ്പിടിച്ചു. അതോടെയാണ് തകർന്ന് തകർന്ന് ഇല്ലാതാകുന്ന അനിൽ അംബാനിയെ യുദ്ധവിമാനംകൊണ്ട് രക്ഷിച്ചുകളയാമെന്ന് നരേന്ദ്ര മോഡി തീരുമാനിച്ചത്. പൊതുമേഖലാ സ്ഥാപനങ്ങളെല്ലാം വിറ്റുതുലയ്ക്കുന്ന കൂട്ടത്തിൽ എച്ച്എഎല്ലും വിൽക്കേണ്ടതായിരുന്നു. ആ കമ്പനിക്ക് വിമാനകരാർ കൊടുത്തതുകൊണ്ട് പ്രത്യേകിച്ച് മോഡിക്ക് അംബാനി കുടുംബത്തിന് അതുവഴി രാജ്യസ്നേഹികൾക്ക് നേട്ടമൊന്നും ഉണ്ടാകാൻ പോകുന്നില്ല. അതുകൊണ്ട് ആ കമ്പനിയെ വെട്ടി പകരം രാജ്യസ്നേഹത്തിനായിമാത്രം പുതിയൊരു കമ്പനി അനിൽ അംബാനിയെക്കൊണ്ട് രൂപീകരിച്ച‌് അതിനാണ് കരാർ കൊടുത്തത്. രാജ്യസ്നേഹികൾ ആകുമ്പോൾ യുദ്ധവിമാന നിർമാണരംഗത്ത് മുൻപരിചയം ഒന്നും ആവശ്യമില്ല. നിർമിക്കുമ്പോഴും ഭാരത് മാതാ കീ ജയ് വിളിച്ചാൽ മതി. യഥാർഥത്തിൽ ഇത്തരം അനുഭവങ്ങൾ ഉണ്ടാകുമ്പോൾ ഭാരതീയൻ കൂടുതൽ രാഷ്ട്രസ്നേഹിയും അഭിമാനിയും ആകുകയാണുവേണ്ടത്. അത് നന്നായി അറിയാവുന്നതുകൊണ്ടാണ് നരേന്ദ്രമോഡി വിഷയത്തെക്കുറിച്ച് ഒന്നും പറയാത്തത്. പൊതുവേ പാലം കഴിഞ്ഞാൽ കൂരായണ എന്നു പറയുന്ന സ്വഭാവം രാഷ്ട്രീയത്തിൽ ഉണ്ട്. മോഡിയിൽനിന്ന് അത് പ്രതീക്ഷിക്കരുത്. തെരഞ്ഞെടുപ്പുകാലത്ത് ഏറ്റവും കൂടുതൽ സേവനം രാജ്യത്തിനുവേണ്ടി അഥവാ നരേന്ദ്ര ഭായിക്കുവേണ്ടി ചെയ്ത കൂട്ടത്തിൽ മുൻ പേരുകാരൻതന്നെയാണ് അനിൽ അംബാനി. മുൻ ചലച്ചിത്രതാരമായ ഭാര്യയോടൊപ്പം അദ്ദേഹം ബിസിനസ് ലോകത്ത് ഓടിയപ്പോൾ സ്വന്തം സഹോദരനോട് ജയിക്കാൻ കഴിഞ്ഞില്ല എന്നത് വാസ്തവം ആകാം. എന്നാൽ, ആ ഭാരതപുത്രൻ സഹായം ചെയ്തുകൊടുക്കാൻ പാടില്ല എന്ന് പ്രതിപക്ഷം പറയുന്നത് തെറ്റുതന്നെ. ഇങ്ങനെ എത്രയെത്ര സഹായങ്ങൾ നരേന്ദ്ര ഭായ് പലർക്കും ചെയ്തുകൊടുത്തിരിക്കുന്നു.
