ആന്റി ഓക്സിഡന്റുകളെപ്പറ്റി വളരെ പറഞ്ഞുകേള്‍ക്കുന്നു. ഗ്രീന്‍ ടീയില്‍ ഒരുപാട് ആന്റി ഓക്സിഡന്റുകള്‍ ഉണ്ടല്ലോ. എന്താണ് ഇവയുടെ പ്രാധാന്യം? ആരോഗ്യകാര്യത്തില്‍ ശ്രദ്ധയുള്ള കൂട്ടുകാരിയുടേതാണ് ഫോണിന്റെ അങ്ങേതലയ്ക്കലുള്ള ഈ വര്‍ത്തമാനം. പിന്നെ കുറച്ചു സംശയങ്ങളും. ജീവന്റെ നിലനില്‍പ്പിനായി ഓരോ കോശങ്ങളിലും ഓക്സീകരണം നടക്കുന്നു. ഊര്‍ജം പകര്‍ന്നുതരാനായുള്ള പ്രയത്നമാണിത്. എന്താകാം ഇതിന്റെ ഗുണവും ദോഷവും? തീ കത്തുന്നത് ഓക്സിജന്റെ സഹായത്തോടെയാണെന്ന് നമുക്കറിയാം. കത്തുമ്പോള്‍ ഉണ്ടാകുന്ന ഊര്‍ജത്തെ പണ്ടേ മനുഷ്യന്‍ തിരിച്ചറിഞ്ഞ് ഉപയോഗിക്കുകയും ചെയ്തിരുന്നു.
ഇതുപോലെ നമ്മുടെ ശരീരത്തിലെ ഓരോ കോശങ്ങള്‍ക്കും ആഹാരത്തില്‍ നിന്ന് ഊര്‍ജം ഉല്‍പ്പാദിപ്പിക്കാന്‍ ഓക്സിജന്റെ സാന്നിധ്യം കൂടിയേതീരു. പക്ഷേ ഈ പ്രക്രിയക്ക് oxidation)) ശരീരം വലിയ വിലകൊടുക്കേണ്ടതുണ്ടെന്ന് നാം മനസ്സിലാക്കിയിട്ടുണ്ടോ? നാം ഊര്‍ജസ്വലതയോടെ മിടുക്കരായി നടക്കുമ്പോള്‍ അതുപോലെത്തന്നെ ഊര്‍ജസ്വലതയുള്ള reactive), സ്ഥിരതയില്ലാത്ത unstable) തന്മാത്രകള്‍ അതോടൊപ്പം നമ്മുടെ ശരീരത്തില്‍ ഉല്‍പ്പാദിപ്പിക്കുന്നുണ്ട്. കുറഞ്ഞ അളവില്‍ ഇവ ശരീരത്തിന്റെ ചില രാസപ്രവര്‍ത്തനങ്ങള്‍ക്ക് ആവശ്യമാണ്. എന്നാല്‍ കൂടിയ അളവിലുള്ള ഇവയുടെ സാന്നിധ്യം നമ്മുടെ ആരോഗ്യമുള്ള ശരീരകോശങ്ങള്‍ക്ക് വളരെ അപകടം ഉണ്ടാക്കും. "ഫ്രീ റാഡിക്കലുകള്‍" എന്നറിയപ്പെടുന്ന ഇത്തരം തന്മാത്രകളില്‍ ജോഡിയില്ലാത്ത ഒരു ഇലക്ട്രോണ്‍ അടങ്ങിയതുകൊണ്ട് അവ അസ്ഥിരമായ അവസ്ഥയിലാണ്. ജോഡിയെ കൂടെ ചേര്‍ത്ത്, സ്ഥിരത കൈവരിക്കുന്നതിനായി ഇവ എപ്പോഴും ഒരുങ്ങിയിരിക്കുകയും രാസപ്രവര്‍ത്തനങ്ങളില്‍ ഏര്‍പ്പെടാന്‍ സദാ തയ്യാറായിരിക്കുകയും reactive) ചെയ്യുന്നു.
ഒരിക്കല്‍ ഒരു രാസപ്രവര്‍ത്തനത്തില്‍ ഏര്‍പ്പെട്ടുകഴിഞ്ഞാല്‍ വീണ്ടും വീണ്ടും പുതിയ ഫ്രീ റാഡിക്കലുകള്‍ ഉണ്ടാകുന്ന രാസപ്രവര്‍ത്തനങ്ങളുടെ ഒരു ചങ്ങലയ്ക്കാണ് (chain reaction) തുടക്കമിടുന്നത്.
ഇത്തരത്തിലുള്ള ഫ്രീ റാഡിക്കലുകളുടെ അമിതമായ ഉല്‍പ്പാദനമാണ് നമ്മുടെ ശരീരകോശങ്ങള്‍ക്ക് അപകടകരമായി മാറുന്നത്. നിരന്തരമായി ഉല്‍പ്പാദിപ്പിക്കുന്ന അപകടകാരികളായ ഈ ഫ്രീ റാഡിക്കലുകളുടെ പ്രവര്‍ത്തനത്തെ ചെറുത്തുതോല്‍പ്പിക്കേണ്ടത് ശരീരകോശങ്ങളുടെ ആരോഗ്യകരമായ നിലനില്‍പ്പിന് വളരെ ആവശ്യമാണ്. അതിനുള്ള കഴിവ് ആന്റി ഓക്സിഡന്റ് (Anti oxidants) എന്ന വിഭാഗം രാസപദാര്‍ഥങ്ങള്‍ക്കുണ്ട്. ശരീരത്തിനു ഹാനികരമായ ഓക്സീകരണത്തെ വൈകിപ്പിക്കുകയോ തടസ്സപ്പെടുത്തുകയോ ചെയ്യുക എന്നതാണ് ഇവയുടെ ധര്‍മം.
അതുവഴി ഫ്രീ റാഡിക്കലുകള്‍ ശരീരത്തെ അപായപ്പെടുത്തുന്നതരം രാസപ്രക്രിയകളെ കുറയ്ക്കാനോ, നിര്‍വീര്യമാക്കാനോ, തടസ്സപ്പെടുത്താനോ കഴിയും. പക്ഷേ, നിര്‍ഭാഗ്യവശാല്‍ ആന്റി ഓക്സിഡന്റ് വിഭാഗത്തില്‍പ്പെട്ട രാസപദാര്‍ഥങ്ങളെ ഉല്‍പ്പാദിപ്പിക്കുന്നതിനുള്ള കഴിവ് നമ്മുടെ ശരീരത്തിനില്ല. അതുകൊണ്ടുതന്നെ നമ്മുടെ ആഹാരക്രമത്തില്‍ ആന്റി ഓക്സിഡന്റുകളെ ഉള്‍പ്പെടുത്തേണ്ടതിന്റെ ആവശ്യം വളരെയാണ്.
ചായയില്‍ അത്യധികമായി അടങ്ങിയ പോളിഫിനോളുകള്‍ (flavonoids), ഫ്ളേവോ നോയിഡുകള്‍ (Polyphenols) എന്നിവ വളരെ നല്ല ആന്റി ഓക്സിഡന്റുകളാണ്. പഴങ്ങളിലും പച്ചക്കറികളിലും ഫ്ളേവോ നോയിഡുകള്‍ ധാരാളമായി കാണുന്നു. ധാരാളം നീരുള്ള പഴങ്ങള്‍ (berry), പലതരം ബീന്‍സുകള്‍ (beans) എന്നിവ നല്ല ആന്റി ഓക്സിഡന്റുകളുടെ സ്രോതസ്സുകളാണ്. നിറത്തിന്റെ ഗാഢത കൂടുന്തോറും ആന്റി ഓക്സിഡന്റുകളുടെ അളവും കൂടുമത്രെ. തക്കാളി, തണ്ണിമത്തന്‍, ചുവന്ന പേരയ്ക്ക, റോസ് മുന്തിരി, പപ്പായ ഇവയ്ക്ക് നിറംകൊടുക്കുന്ന രാസവസ്തുവാണ് ലൈകോപ്പീന്‍. ഇതിന് ആന്റി ഓക്സിഡന്റായി പ്രവര്‍ത്തിക്കാനുള്ള കഴിവുണ്ട്. തക്കാളി പാകംചെയ്തു കഴിയുമ്പോഴാണ് ഈ രാസപദാര്‍ഥത്തിന് പുറത്തുവരാനുള്ള അവസരം ലഭിക്കുന്നത്.
ഇറച്ചി, ധാന്യങ്ങള്‍ (Whole Grains), കുരുക്കള്‍ (Nuts), വെളുത്തുള്ളി, കടലില്‍നിന്നുമുള്ള ഭക്ഷണപദാര്‍ഥങ്ങള്‍ (Sea foods) എന്നിവയില്‍ ധാരാളം സെലിനിയം അടങ്ങിയിരിക്കുന്നു. ക്യാരറ്റ്പോലുള്ള ഓറഞ്ചുനിറമുള്ളവയിലും, കടുത്ത പച്ചനിറമുള്ള പച്ചക്കറികളിലും ബീറ്റാ കരൊട്ടിന്‍ ഉണ്ട്. മത്സ്യത്തിലെ ഒമേഗാ മൂന്ന് ഫാറ്റി ആസിഡുകള്‍ നല്ല ആന്റി ഓക്സിഡന്റുകളാണ്. ട്യൂമറുള്ള കോശങ്ങളുടെ വളര്‍ച്ചാനിരക്ക് ഒരുപരിധിവരെ കുറയ്ക്കാനും, കീമോതെറാപ്പിയുടെ തിക്തഫലങ്ങള്‍ കുറയ്ക്കാനും ഇവയ്ക്കു കഴിയുമെന്ന് പഠനങ്ങള്‍ പറയുന്നു. ആരോഗ്യമുള്ള ശരീരകോശങ്ങള്‍ വളരെ കുറഞ്ഞ തോതില്‍ ഫ്രീ റാഡിക്കലുകള്‍ ഉല്‍പ്പാദിപ്പിക്കുന്നുണ്ട്.
പക്ഷേ, റേഡിയേഷന്‍, പുകവലി, മദ്യം, അന്തരീക്ഷ മലിനീകരണം തുടങ്ങിയ അനേകം ഘടകങ്ങള്‍ ഇതിനെ പതിന്മടങ്ങായി വര്‍ധിപ്പിക്കുന്നു എന്നു നാം മനസ്സിലാക്കണം. ശരീരത്തില്‍ അമിതമായ നിരക്കില്‍ ഇവ ഉല്‍പ്പാദിപ്പിക്കുമ്പോള്‍ നമ്മുടെ ഡിഎന്‍എ (അതുവഴി ജനിതക ഘടനയ്ക്കും Genetic material), കൊഴുപ്പുകള്‍ (lipids), മാംസ്യതന്മാത്രകള്‍ (Proteins) എന്നിവയെ ഗുരുതരമായി ബാധിക്കും. ഒരിക്കലും ശരിയാക്കാന്‍ പറ്റാത്ത ഇത്തരം മാറ്റങ്ങള്‍ ക്യാന്‍സറിനും, മറ്റു പലതരം അസുഖങ്ങള്‍ക്കും വഴിതുറക്കും. പ്രായം കൂടുന്തോറും, ഫ്രീ റാഡിക്കലുകളെ ചെറുത്തുതോല്‍പ്പിക്കാനുള്ള ശരീരത്തിന്റെ കഴിവ് കുറഞ്ഞുവരുമെന്നതും ഓര്‍മിക്കണം. ക്യാന്‍സര്‍, രക്തചംക്രമണ വ്യവസ്ഥ ഉണ്ടാകുന്ന പലതരത്തിലുള്ള പ്രശ്നങ്ങള്‍, തിമിരം, എല്ല്, സന്ധി എന്നിവയുടെ പ്രവര്‍ത്തനം വഷളാകുക, രോഗപ്രതിരോധവ്യവസ്ഥ താറുമാറാകുക, പ്രായമേറി വരുന്നതിന്റെ ലക്ഷണങ്ങള്‍ വളരെ വേഗം പ്രകടമാവുക, അവയവങ്ങളുടെ തേയ്മാനം എന്നിവയാണ് ഫ്രീ റാഡിക്കലുകള്‍ അമിതമായി ഉല്‍പ്പാദിപ്പിക്കപ്പെടുന്നതുമൂലം ശരീരത്തില്‍ വരുന്ന പ്രശ്നങ്ങള്‍.
ക്യാന്‍സര്‍ (പ്രോസ്റ്റേറ്റ്, ശ്വാസകോശം, മലാശയം), പാര്‍ക്കിന്‍സോണിസം, അല്‍ഷിമേഷ്ഴ്സ്, ഹൃദ്രോഗങ്ങള്‍, പേശികളുടെ നാശംമൂലമുണ്ടാകുന്ന കണ്ണിന്റെ പ്രശ്നങ്ങള്‍ (തിമിരം), ഇവയില്‍നിന്നൊക്കെ ശരീരത്തെ സംരക്ഷിക്കാന്‍ ആന്റി ഓക്സിഡന്റുകള്‍ക്കു സാധിക്കും. വിറ്റാമിന്‍ സി, വിറ്റാമിന്‍ ഇ, ബീറ്റാ കരോട്ടിന്‍ ഇവയൊക്കെ ഭക്ഷണത്തില്‍ ഉള്‍പ്പെടുത്താന്‍ ശ്രദ്ധിക്കുക.
ഓക്സിജന്‍ റാഡിക്കല്‍ അബ്സോര്‍ബന്‍സ് കപ്പാസിറ്റി (ORAC Score) എന്നതാണ് ഒരു രാസപദാര്‍ഥത്തിന്റെ ആന്റി ഓക്സിഡന്റ് കഴിവിനെ അളക്കാന്‍ ഉപയോഗിക്കുന്ന മാനദണ്ഡം. സാന്ദ്രത കുറഞ്ഞ വിഭാഗത്തില്‍പ്പെട്ട കൊഴുപ്പിനെ ലോ ഡെന്‍സിറ്റി ലിപൊപ്രോട്ടീന്‍ അഥവാ LDL Cholestrol എന്നു വിളിക്കുന്നു. ചീത്ത കൊളസ്ട്രോള്‍ എന്നു പൊതുവെ ഇവയെ കണക്കാക്കുന്നു. ശരീരത്തിലെ ഓക്സീകരണ പ്രക്രിയകളില്‍ ഈ വിഭാഗം കൊഴുപ്പുകളുടെ ഓക്സീകരണവും നടക്കാനിടയാകും. പക്ഷേ ഇവയുടെ ഓക്സീകരണം ഹൃദയപ്രവര്‍ത്തനത്തെ താറുമാറാക്കി രോഗാവസ്ഥയിലെത്തിക്കും.
ശരീരത്തിനു ഹാനികരമായ ഈ ഓക്സികരണം തടയാന്‍ ആന്റി ഓക്സിഡന്റുകള്‍ക്കു കഴിയും. ക്യാന്‍സറിന് കാരണമാകുന്ന ഫ്രീ റാഡിക്കലുകളെ നിര്‍വീര്യമാക്കുന്നതുവഴിയാണ് ഇവ ശരീരത്തെ ക്യാന്‍സറില്‍നിന്നു സംരക്ഷിക്കുന്നത്. പ്രകൃതിയില്‍നിന്നു ലഭിക്കുന്ന ആന്റി ഓക്സിഡന്റുകളാണ് ഗവേഷണങ്ങളില്‍ പലപ്പോഴും ഉള്‍പ്പെടുത്തിയിട്ടുള്ളതും ഗുണകരമെന്നു കണ്ടെത്തിയിട്ടുള്ളതും. സപ്ലിമെന്റുകളായി ഇവ വിപണിയില്‍ ലഭ്യമാകുമ്പോള്‍ മറ്റു മരുന്നുകളുമായും ഭക്ഷണപദാര്‍ഥങ്ങളുമായും പ്രതിപ്രവര്‍ത്തിക്കാനുള്ള സാധ്യതകള്‍ തള്ളിക്കളയാനാവില്ല. ഒരു പ്രത്യേക കാലയളവുവരെ കേടുകൂടാതെ സംരക്ഷിക്കാന്‍ മറ്റു രാസവസ്തുക്കള്‍ ചേര്‍ക്കുന്നതും കൂടുതലായ അളവില്‍ ഇതു ശരീരത്തില്‍ തങ്ങിനില്‍ക്കുന്നതും അത്ര നന്നല്ല. എന്നിരുന്നാലും ചില പ്രത്യേക സാഹചര്യങ്ങളിലും അസുഖങ്ങള്‍ക്കും വിപണിയിലുള്ള ആന്റി ഓക്സിഡന്റ് ഉല്‍പ്പന്നങ്ങള്‍ ഡോക്ടര്‍ കുറിക്കാറുണ്ട്. നിര്‍ദേശിക്കുന്ന അളവില്‍, തുടരേണ്ട കാലയളവുവരെ അത്തരം സാഹചര്യങ്ങളില്‍ ഇവ ഉപയോഗിക്കുന്നതില്‍ തെറ്റില്ല.
വിപണിയില്‍ ലഭ്യമാകുന്ന ആന്റി ഓക്സിഡന്റുകള്‍ സ്ഥിരമായിട്ട് മരുന്നായി ഉപയോഗിക്കുന്നവര്‍, മറ്റ് അസുഖങ്ങള്‍ക്ക് ഡോക്ടറെ കാണുമ്പോള്‍ ഈ വിവരം അദ്ദേഹത്തോടു പറയണം. ഒരിക്കല്‍ രക്തക്കുഴലുകളില്‍ രക്തം കട്ടപിടിച്ച് തടസ്സമുണ്ടായിട്ട് അതിനെതിരെ മരുന്നു കഴിക്കേണ്ടിവരുമ്പോള്‍ പ്രധാനമായും ഇതു ശ്രദ്ധിക്കണം. വിറ്റാമിന്‍ ഇ, രക്തം കട്ടപിടിക്കുന്നതിന്റെ സമയത്തെ ദീര്‍ഘിപ്പിക്കും. ഈ വിഭാഗം മരുന്നുകഴിക്കുമ്പോള്‍ ഒരു മുറിവുണ്ടായാല്‍ രക്തം കട്ടപിടിക്കാന്‍ താമസമുണ്ടാകും. കൂടെ വിറ്റാമിന്‍ ഇ കൂടി പതിവായി കഴിക്കുന്നത് ഇരട്ടി പ്രശ്നമാകുമെന്നതാണ് കാരണം. കൊളസ്ട്രോളിനെതിരെ സ്റ്റാറ്റിന്‍ വിഭാഗം മരുന്നുകഴിക്കുന്നവരും ആന്റി ഓക്സിഡന്റുകള്‍ നിരന്തരമായി കഴിക്കുന്നുവെങ്കില്‍ അത് ഡോക്ടറുടെ ശ്രദ്ധയില്‍പ്പെടുത്തണം. കാരണം, ചില ആന്റി ഓക്സിഡന്റുകള്‍, സ്റ്റാറ്റിന്‍ വിഭാഗം മരുന്നുകളുടെ ഗുണത്തെ കുറയ്ക്കുമെന്ന് പഠനങ്ങള്‍ ചൂണ്ടിക്കാണിക്കുന്നു. http://marunnarivukal.blogspot.com
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
