ഐഎഫ്എഫ്കെ: സാഹിത്യപ്രതിഭകളുടെ ഓർമകൾക്ക് ആദരമർപ്പിച്ച് ലിറ്റററി ട്രിബ്യൂട്ട്

തിരുവനന്തപുരം > കേരള രാജ്യാന്തര ചലച്ചിത്ര മേളയിൽ മലയാളത്തിന്റെ പ്രിയ സാഹിത്യകാരന്മാർക്ക് ആദരം. യശശ്ശരീരരായ തോപ്പിൽ ഭാസി, പി ഭാസ്‌കരൻ, പാറപ്പുറത്ത് എന്നിവരോടുള്ള ആദരസൂചകമായി മേളയിൽ ലിറ്റററി ട്രിബ്യൂട്ട് സംഘടിപ്പിക്കും. തോപ്പിൽ ഭാസി തിരക്കഥ എഴുതി പി ഭാസ്‌കരൻ സംവിധാനം ചെയ്ത മൂലധനം, പാറപ്പുറത്ത് കഥയും തിരക്കഥയും എഴുതിയ അരനാഴികനേരം, പി ഭാസ്‌കരന്റെയും രാമു കാര്യാട്ടിന്റെയും കൂട്ടുകെട്ടിൽ സംവിധാനം ചെയ്ത നീലക്കുയിൽ എന്നീ സിനിമകളുടെ പ്രദർശനം ചലച്ചിത്ര മേളയിൽ നടക്കും. മൂലധനം ഡിസംബർ 14ന് രാത്രി എട്ടിന് ഏരിസ്പ്ലക്‌സ് സ്‌ക്രീൻ 4ൽ പ്രദർശിപ്പിക്കും. അരനാഴികനേരം 15നു രാത്രി 8.30നും നീലക്കുയിൽ 17നു രാവിലെ 11.30നും നിള തിയേറ്ററിൽ പ്രദർശിപ്പിക്കും.

തോപ്പിൽ ഭാസി എന്നറിയപ്പെടുന്ന തോപ്പിൽ ഭാസ്‌കരപിള്ള 1924 ഏപ്രിൽ 8-ന് ആലപ്പുഴ ജില്ലയിലെ വള്ളികുന്നത്ത് ജനിച്ചു. നാടകകൃത്ത്, തിരക്കഥാകൃത്ത്, ചലച്ചിത്ര സംവിധായകൻ എന്നീ നിലകളിൽ പ്രമുഖനായിരുന്നു. 1954-ലെ 'നിങ്ങളെന്നെ കമ്മ്യൂണിസ്റ്റാക്കി' എന്ന വിപ്ലവ നാടകം നാടക ചരിത്രത്തിലെ വഴിത്തിരിവായി മാറി. കെപിഎസിയെ കേരളത്തിലെ മുൻനിര നാടക പ്രസ്ഥാനമാക്കുന്നതിൽ തോപ്പിൽ ഭാസി വഹിച്ച പങ്ക് വലുതാണ്. മുടിയനായ പുത്രൻ, പൊന്നി തുടങ്ങി നിരവധി സിനിമകളുടെ തിരക്കഥാകൃത്തും ഒരു സുന്ദരിയുടെ കഥ, യുദ്ധകാണ്ഡം തുടങ്ങിയ ചിത്രങ്ങളുടെ സംവിധായകനുമായിരുന്നു. അദ്ദേഹം സംവിധാനം ചെയ്ത ശരശയ്യ എന്ന ചിത്രത്തിന് 1971-ൽ മികച്ച ചിത്രത്തിനുള്ള കേരള സംസ്ഥാന ചലച്ചിത്ര അവാർഡും മൂലധനം എന്ന സിനിമയ്ക്ക് 1969-ൽ മികച്ച കഥയ്ക്കുള്ള കേരള സംസ്ഥാന ചലച്ചിത്ര അവാർഡും ലഭിച്ചു.

ഗാനരചയിതാവ്, സംവിധായകൻ, നിർമാതാവ് എന്നീ നിലകളിൽ പ്രശസ്തനായ പി ഭാസ്‌കരൻ 1924 ഏപ്രിൽ 21ന് തൃശ്ശൂരിലെ കൊടുങ്ങല്ലൂരിൽ ജനിച്ചു. 1949-ൽ പുറത്തിറങ്ങിയ 'അപൂർവ്വസഹോദരർകൾ' എന്ന തമിഴ് ചിത്രത്തിലെ ഏതാനും മലയാളം വരികളാണ് ആദ്യ ചലച്ചിത്ര ഗാനം. ചന്ദ്രിക എന്ന ചിത്രത്തിന് ഗാനങ്ങൾ രചിച്ചുകൊണ്ടാണ് മലയാള സിനിമാലോകത്തേക്കു കടന്നു. പി ഭാസ്‌കരനും രാമു കാര്യാട്ടും ചേർന്ന് സംവിധാനം ചെയ്ത് 1954 ൽ പുറത്തിറങ്ങിയ 'നീലക്കുയിൽ' എന്ന ചിത്രത്തിലെ ഗാനങ്ങളിലൂടെയാണ് മലയാള സിനിമാഗാനരംഗത്ത് സജീവ സാന്നിധ്യമായത്. 47ഓളം ചിത്രങ്ങൾ സംവിധാനം ചെയ്യുകയും ഏഴു സിനിമകൾ നിർമിക്കുകയും ചെയ്തു. 1955ൽ നീലക്കുയിലിന് മികച്ച ചിത്രത്തിനുള്ള രജത കമലം അവാർഡും, 1994 ൽ സിനിമ മേഖലയിലെ സമഗ്രസംഭാവനയ്ക്കുള്ള ജെ സി ഡാനിയേൽ പുരസ്‌കാരവും ഭാസ്‌കരൻ മാസ്റ്റർക്ക് ലഭിച്ചിട്ടുണ്ട്. രജതകമലം അവാർഡ് കിട്ടിയ ആദ്യ മലയാള സിനിമയാണ് നീലക്കുയിൽ. ജാതിവിവേചനവും അയിത്തവുമാണ് ഈ ചിത്രത്തിന്റെ പ്രമേയം.1960-കളിലെ കേരളത്തിലെ കമ്മ്യൂണിസ്റ്റ് പ്രസ്ഥാനത്തെ പശ്ചാത്തലമാക്കിയുള്ള ചിത്രമാണ് മൂലധനം. സാമൂഹിക അസമത്വം, ദാരിദ്ര്യം എന്നീ വിഷയങ്ങളാണ് ചിത്രം കൈകാര്യം ചെയ്യുന്നത്.

മലയാളത്തിലെ പ്രശസ്തനായ നോവലിസ്റ്റും ചെറുകഥാകൃത്തുമായ പാറപ്പുറത്ത് മാവേലിക്കര താലൂക്കിലെ കുന്നം ഗ്രാമത്തിൽ 1924 നവംബർ 14നു ജനിച്ചു. രണ്ട് തവണ കേരള സാഹിത്യഅക്കാദമി അവാർഡും കേരള ചലച്ചിത്ര അവാർഡും ലഭിച്ചിട്ടുള്ള അദ്ദേഹം 20 നോവലുകൾ, 14 കഥാസമാഹാരങ്ങൾ, 15 തിരക്കഥകൾ എന്നിവ രചിച്ചിട്ടുണ്ട്. അരനാഴികനേരം എന്ന കൃതി പിന്നീട് ഇതേ പേരിൽ സിനിമയാവുകയും 1968-ലെ കേരള സാഹിത്യ അക്കാദമി അവാർഡ് നേടുകയും ചെയ്തിട്ടുണ്ട്. ഓമന, പണിതീരാത്തവീട്, നിണമണിഞ്ഞ കാൽപ്പാടുകൾ, ആദ്യകിരണങ്ങൾ, മകനേ നിനക്കുവേണ്ടി, അന്വേഷിച്ചു കണ്ടെത്തിയില്ല തുടങ്ങിയ കൃതികളും പിന്നീട് സിനിമകളായി മാറി.

ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..