ആലപ്പുഴ
ജനങ്ങളെ ഭീതിയിലാക്കിയ മോഷണപരമ്പരയിൽ പിടിയിലായ തമിഴ്‌നാട്‌ തിരുച്ചിറപ്പള്ളി സ്വദേശി സന്തോഷ്‌ സെൽവം(25) കുറുവ സംഘാംഗമെന്ന്‌ പൊലീസ്‌ സ്ഥിരീകരിച്ചു. 14 അംഗ കുറുവ സംഘത്തിലെ പ്രധാനിയാണ് ഇയാളെന്ന്‌ ഡിവൈഎസ്‌പി എം ആർ മധുബാബു പറഞ്ഞു.
ഇയാളുടെ നെഞ്ചിൽ പച്ചകുത്തിയ അടയാളമുള്ളതായി സംഭവസ്ഥലങ്ങളിലെ ദൃക്‌സാക്ഷികളിൽനിന്ന്‌ ലഭിച്ച വിവരമാണ്‌ വഴിത്തിരിവായത്‌. ദൃശ്യങ്ങളിൽ കണ്ടയാളുടെ ശരീരഘടന, പച്ചകുത്തിയ അടയാളം എന്നിവയടക്കമുള്ള വിവരങ്ങൾ വിവിധ സ്‌റ്റേഷനുകളിലേക്ക്‌ പൊലീസ്‌ കൈമാറിയിരുന്നു. ‘ജ്യോതി’ എന്ന്‌ ഭാര്യയുടെ പേരാണ്‌ പച്ചകുത്തിയിരുന്നത്‌.
അടയാളങ്ങൾവച്ച്‌ സന്തോഷിനെ തിരിച്ചറിഞ്ഞത്‌ തിരുച്ചിറപ്പള്ളി പൊലീസാണ്‌. ഇയാൾക്കൊപ്പം പിടിയിലായ മണികണ്ഠനെക്കുറിച്ചുള്ള വിവരങ്ങൾ പൊലീസ്‌ ശേഖരിച്ചുവരികയാണ്‌. ഇയാൾക്കെതിരെ തമിഴ്‌നാട്ടിൽ 18 കേസും കോട്ടയം ജില്ലയിൽ വിവിധയിടങ്ങളിലായി എട്ടു കേസുമുണ്ട്‌. പ്രതിയെ കോടതി റിമാൻഡ്‌ ചെയ്‌തു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
