തൃക്കരിപ്പൂർ
ഗൾഫിൽനിന്ന്‌ അവധിക്ക് വരുമ്പോൾ വിമാനമിറങ്ങി സൈക്കിളിൽ വീട്ടിലേക്ക് പോകണമെന്നായിരുന്നു സലീമിന്റെ ആഗ്രഹം. തൃക്കരിപ്പൂരിലെ സൈക്ലിങ്‌ കൂട്ടായ്മയായ ടിസിസിയിലെ സുഹൃത്തുക്കളോട് ആഗ്രഹം പങ്കുവച്ചപ്പോൾ, അവർ കൂടെ നിന്നു.
കണ്ണൂർ വിമാനത്താവളത്തിൽനിന്ന് 80 കിലോമീറ്റർ അകലെ പടന്ന ഗണേഷ് മുക്കിലാണ് ദുബായിയിൽ ജോലിചെയ്യുന്ന പരിച്ചുമാടത്ത് സലീമിന്റെ വീട്.
പുലർച്ചെ രണ്ടിന് വിമാനമിറങ്ങിയ സലീമിനെ തൃക്കരിപ്പൂർ സൈക്ലിങ്‌ ക്ലബ് പ്രസിഡന്റ്‌ ടി എം സി ഇബ്രാഹിം, അംഗങ്ങളായ ഷബീർ മാട്ടൂൽ, എ ജി ഫായിസ് എന്നിവർ സ്വീകരിച്ചു. പടന്നയിൽനിന്ന് വാഹനത്തിൽ എത്തിച്ച സൈക്കിളിൽ പുലർച്ചെ മൂന്നിന്‌ പുറപ്പെട്ട് ഏഴോടെ വീട്ടിലെത്തി. ലഗേജ് വാഹനത്തിൽ കയറ്റിവിട്ടു. സൈക്കിൾ യാത്രയിൽ ഇബ്രാഹിമും സലീമിനെ അനുഗമിച്ചു.
അടുത്ത വർഷത്തെ ലണ്ടൻ എഡിൻബറോ ലണ്ടൻ (എൽഇഎൽ) 1200 കിലോമീറ്റർ എൻഡ്യൂറൻസ് റൈഡിൽ പങ്കെടുക്കാനുള്ള തയ്യാറെടുപ്പിലാണ് സലീം. ദുബായിയിൽ ഡിഎക്സ്ബി റൈഡേഴ്സ് അംഗമായ സലീം അവിടത്തെ റൈഡുകളിൽ പങ്കെടുക്കാറുണ്ട്. ദേശാന്തര ടീമുകൾ പങ്കെടുത്ത സലീം അജ്മാൻ റോഡ് സൈക്ലിങ്ങിൽ മൂന്നാം സ്ഥാനം നേടിയിരുന്നു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
