സുബൈദുമ്മ, 
ഈ സ്‌നേഹത്തിന്‌ നൂറുമ്മ

കൊല്ലം

‘രാവിലെ ടിവിയിൽ കണ്ട വാർത്തയിൽ കോവിഡ് പ്രതിരോധത്തിന് മരുന്ന് പണം കൊടുത്താണ് സർക്കാർ വാങ്ങുന്നതെന്ന് അറിഞ്ഞു. കാശുകൊടുത്ത് മരുന്നു വാങ്ങാൻ കഴിയാത്തവരെ സഹായിക്കാനാണ് ദുരിതാശ്വാസ നിധിയിലേക്ക് സംഭാവന നൽകിയത്’–--പ്രളയകാലത്ത്‌ സ്വന്തം ആടുകളെ വിറ്റ്‌ നാടിനു‌ കരുതലേകിയ സുബൈദ വീണ്ടും ഹീറോയായി. ഇത്തവണ വാക്‌സിൻ ചലഞ്ചിൽ പങ്കെടുക്കാനാണ്‌ പള്ളിത്തോട്ടം പൊലീസ്‌ സ്റ്റേഷനു സമീപം ചായക്കട നടത്തുന്ന പോർട്ട്‌ സ്വദേശി സുബൈദ ആടുകളെ വിറ്റ കാശിൽ ഒരു പങ്ക് ചെലവിട്ടത്‌. 5000 രൂപ കലക്ടർ ബി അബ്ദുൽ നാസറിന്‌ കഴിഞ്ഞ ദിവസം ഓഫീസിൽ എത്തി സഹായം കൈമാറി. 

നാട്ടുകാർ സ്‌നേഹത്തോടെ സുബൈദുമ്മ എന്നു വിളിക്കുന്ന സുബൈദ എല്ലാവർഷവും നോമ്പുകാലത്ത്‌ തന്റെ വീടിന്റെ പരിസരത്തുള്ള കുടുംബങ്ങൾക്ക് അരിയും പലവ്യഞ്ജന സാധനങ്ങളും അടങ്ങുന്ന കിറ്റ് നൽകാറുണ്ട്. ഇത്തവണ മുപ്പതോളം കുടുംബങ്ങൾക്ക് കിറ്റും തുകയും നൽകാൻ തന്റെ നാല്‌ ആടുകളെ വിറ്റു. ഇതിൽ ബാക്കിവന്ന തുകയാണ്‌ ദുരിതാശ്വാസനിധിയിലേക്കു നൽകിയത്‌. വെള്ളിയാഴ്ച രാവിലെ ടിവിയിലൂടെയാണ്‌ വാക്സിൻ ചലഞ്ചിനെപ്പറ്റി സുബൈദ ഉമ്മ അറിയുന്നത്. ഉടൻ ഭർത്താവ് അബ്ദുൽ സലാമിനോട് തുക മുഖ്യമന്ത്രിയുടെ ദുരിതാശ്വാസനിധിയിലേക്കു നൽകണമെന്ന് പറഞ്ഞു. വൈകാതെ കലക്ടറെ നേരിൽക്കണ്ട് തുക കൈമാറുകയായിരുന്നു. സംഭാവന നൽകുന്ന കാര്യം മറ്റാരും അറിയരുതെന്ന്‌ കലക്ടറോട്‌ പറഞ്ഞിരുന്നു. 

വെള്ളിയാഴ്‌ച വൈകിട്ടത്തെ വാർത്താസമ്മേളനത്തിൽ മുഖ്യമന്ത്രി പിണറായി വിജയൻ സുബൈദയുടെ പേര് പരമാർശിച്ചതിനു പിന്നാലെ നിരവധി പേരാണ് ആശംസകളുമായി പള്ളിത്തോട്ടത്തെ ചായക്കടയിലേക്ക് എത്തിയത്. "400 രൂപയാണ് വാക്സിൻ വില. അതെടുക്കാൻ ഉള്ളവരും ഇല്ലാത്തവരും കാണും. എനിക്കൊന്നും ഉണ്ടായിട്ടല്ല, എന്നാൽ, കാശില്ലാത്തതിന്റെ പേരിൽ ആരും രോഗംവന്ന്‌ മരിക്കാൻ പാടില്ല. അതുകൊണ്ടാണ്‌ സംഭാവന നൽകിയത്’–- കടയിലെത്തുന്നവരോട്‌ സുബൈദയ്‌ക്ക്‌ പറയാനുള്ളത്‌ ഇത്രമാത്രം. ഹൃദ്‌രോഗിയായ ഭർത്താവ് അബ്ദുൽ സലാമിനും സഹോദരനുമൊപ്പം ചായക്കടയിൽനിന്നു ലഭിക്കുന്ന വരുമാനം കൊണ്ടാണ് സുബൈദയുടെ ജീവിതം മുന്നോട്ടു കൊണ്ടുപോകുന്നത്. 

ഹിറ്റായി വാക്‌സിൻ ചലഞ്ച്‌