സെ​ന്റ് ജോർജ് ചുണ്ടൻ ഇന്ന് നീരണിയും

പരുമല കടവിൽ സെ​ന്റ് ജോർജ് ചുണ്ടൻ വള്ളം ഞായറാഴ്‌ച‌ നീരണിയും. ഖത്തറിലെ പ്രമുഖ ഡോക്ടറും കേരള ഭൂഷണം മാനേജിങ് ഡയറക്ടറുമായ കടവിൽ ഡോ. കെ സി ചാക്കോയും മകൻ ഡോ. അമിത് ജോർജ് ജേക്കബുമാണ് വള്ളത്തി​ന്റെ ഉടമകൾ. അമ്പത്തിരണ്ടേകാൽ കോൽ നീളവും അമ്പത്തിരണ്ട് അംഗുലം വീതിയുമുള്ള കടവിൽ സെ​ന്റ് ജോർജ് ചുണ്ടനിൽ തൊണ്ണൂറ്റി മൂന്ന് തുഴക്കാരും അഞ്ച് അമരക്കാരും ഒമ്പത് താളക്കാരും രണ്ട് ഇടിക്കാരും ഉൾപ്പെടെ 109 പേരെ വഹിക്കാനാകും. 

  ചുണ്ടൻ വള്ളങ്ങളുടെ പെരുന്തച്ചൻ ഉമാ മഹേശ്വര​ന്റെ നേതൃത്വത്തിൽ ഒമ്പതു മാസമെടുത്താണ് ചുണ്ട​ന്റെ പണി പൂർത്തിയാക്കിയത്. പകൽ 11 ന് മാവേലിക്കര ഭദ്രാസന മെത്രാപോലീത്ത മാത്യൂസ് മാർ എപ്പിഫാനിയോസ്  ചുണ്ടൻ വള്ളത്തി​ന്റെ കൂദാശ നടത്തും. പൊതുസമ്മേളനം മുൻമന്ത്രി കെ സി ജോസഫ്  ഉദ്ഘാടനം ചെയ്യും. കെ സി ചെറിയാൻ അധ്യക്ഷനാകും. ആന്റോ ആന്റണി എംപി, നടൻ കൈലാഷ് എന്നിവർ പങ്കെടുക്കും.