ആലപ്പുഴ
മുൻഭാര്യയെ കത്രികകൊണ്ട് കുത്താൻശ്രമിച്ച യുവാവ് അറസ്റ്റിൽ. ആലപ്പുഴ റെയിൽവേ സ്റ്റേഷൻ വാർഡിൽ തൈപറമ്പിൽ വീട്ടിൽ ജോൺ മാനുവലിനെയാണ് (41) സൗത്ത് പൊലീസ് അറസ്റ്റ് ചെയ്തത്. തിങ്കളാഴ്ച രാത്രി എട്ടിന് ആലപ്പുഴ റെയിൽവേ സ്റ്റേഷന് സമീപത്തെ തപാൽ സൂപ്രണ്ട് ഓഫിസിന് മുന്നിലായിരുന്നു സംഭവം. ആലപ്പുഴയിലെ സ്വകാര്യസ്ഥാപനത്തിൽനിന്ന് ജോലികഴിഞ്ഞ് വീട്ടിലേക്ക് മടങ്ങിയ 32 കാരിയെയാണ് ജോൺ മാനുവൽ കുത്താൻ ശ്രമിച്ചത്. പാതയോരത്ത് പതിയിരുന്ന ഇയാൾ യുവതിയെ കയറിപ്പിടിക്കുകയും കുതറിയോടിയപ്പോൾ ഓടിച്ചിട്ട് കത്രിക ഉപയോഗിച്ച് കുത്താൻശ്രമിക്കുകയും ചെയ്തു. ഓട്ടത്തിനിടെ വീണ ഇയാളെ നാട്ടുകാർ ചേർന്ന് പിടികൂടി. വീഴ്ചയിൽ ഇയാളുടെ കൈക്ക് പരിക്കേറ്റിരുന്നു.
ഇവർ തമ്മിലുള്ള വിവാഹബന്ധം രണ്ടുവർഷംമുമ്പ് വേർപെടുത്തിയിരുന്നു. എന്നിട്ടും പിറകേനടന്ന് ശല്യംചെയ്യുകയാണെന്ന് ചൂണ്ടിക്കാട്ടി യുവതി ഒരുമാസം മുമ്പ് പൊലീസിൽ പരാതി നൽകി. ഇതിന് പിന്നാലെയാണ് കൊലപ്പെടുത്തുകയെന്ന ലക്ഷ്യത്തോടെ കത്രികയുമായി ഇയാൾ എത്തിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
