കോഴിക്കോട്
സ്വകാര്യ ബസുകളിൽ വിദ്യാർഥികളുടെ യാത്രാ കൺസഷൻ അനുവദിക്കുന്നതിന് ആപ്പ് ഒരുക്കുമെന്ന്‌ മന്ത്രി കെ ബി ഗണേഷ് കുമാർ പറഞ്ഞു. കെഎസ്ആർടിസി ടെർമിനലിൽ ശീതീകരിച്ച വിശ്രമമുറി ഉദ്‌ഘാടനംചെയ്യുകയായിരുന്നു അദ്ദേഹം. സർക്കാർ, എയ്ഡഡ് സ്ഥാപനങ്ങളിലെ വിദ്യാർഥികൾക്ക് ആപ്പ് വഴി മോട്ടോർ വെഹിക്കിൾ ഡിപ്പാർട്ട്മെന്റിന് അപേക്ഷിക്കാം.
ഓഫീസിൽനിന്ന് അനുവദിക്കുന്ന പാസ് ഉപയോഗിച്ച് വിദ്യാർഥികൾക്ക് യാത്ര ചെയ്യാം. ബസിൽ പണം കൊടുത്താൽ മതി. കെഎസ്ആർടിസി ഓൺലൈൻ കൺസഷൻ കാർഡ് വിജയകരമാണ്. 1.4 ലക്ഷം പേർ അപേക്ഷിച്ചിരുന്നു. തള്ളിയ 4000 അപേക്ഷകളൊഴികെ ബാക്കി എല്ലാവർക്കും ദിവസങ്ങൾക്കകം പാസ് അനുവദിച്ചു.
എല്ലാ കെഎസ്ആർടിസി സർവീസുകളും ആഴ്ചകൾക്കകം ചലോ ആപ്പുമായി ബന്ധിപ്പിക്കും. ബസുകൾ എപ്പോൾ വരുമെന്ന് യാത്രക്കാർക്ക് ആപ്പിലൂടെ അറിയാനാവും. 40 സൂപ്പർ ഫാസ്റ്റ് പ്രീമിയം ബസുകൾ ഒക്ടോബർ 10 മുതൽ റോഡിലിറങ്ങും. ഭക്ഷണത്തിനും പ്രാഥമിക കൃത്യങ്ങൾക്കും മാത്രമേ ബസ് നിർത്തൂ. നല്ല ഭക്ഷണവും വിശ്രമസൗകര്യവും ഒരുക്കുന്നതിനായി സ്വകാര്യ റസ്റ്റോറന്റുകളിൽനിന്ന് അപേക്ഷ ക്ഷണിച്ചിട്ടുണ്ട്. ശീതീകരിച്ച വിശ്രമമുറികൾ പാലക്കാട്, എറണാകുളം ജില്ലകളിൽ ഉടൻ ആരംഭിക്കുമെന്ന്‌ മന്ത്രി പറഞ്ഞു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
