ഉല്‍പ്പന്ന വൈവിധ്യവുമായി 
കുടുംബശ്രീ ഓണം വിപണനമേള

വൈവിധ്യത്തിന്റെയും രുചിപ്പെരുമയുടെയും ഓണമൊരുക്കാൻ കുടുംബശ്രീ ജില്ലാതല ഓണം വിപണനമേളയ്‍ക്ക് കട്ടപ്പന ​ഗാന്ധി സ്‍ക്വയറിൽ തുടക്കമായി. ന​ഗരസഭ ചെയർപേഴ്‍സൺ ബീന ടോമി ഉദ്ഘാടനംചെയ്‍തു. സ്ഥിരംസമിതി അധ്യക്ഷ ജാൻസി ബേബി അധ്യക്ഷയായി. ഉപഭോക്താക്കൾക്ക് ന്യായവിലയ്‍ക്ക് ഉൽപ്പന്നങ്ങൾ ലഭ്യമാക്കുകയാണ് ലക്ഷ്യം. ജില്ലയിലെ വിവിധ കുടുംബശ്രീ സംരംഭകരുടെ ഉൽപ്പന്നങ്ങൾ, ജെഎൽ‍ജി കർഷകരുടെ പച്ചക്കറികൾ, അച്ചാറുകൾ, സ്‌ക്വാഷുകൾ, പലഹാരങ്ങൾ, കറി പൗഡറുകൾ, സു​ഗന്ധവ്യഞ്ജനങ്ങൾ തുടങ്ങിയവ വാങ്ങാം. കുടുംബശ്രീ ബ്രാൻഡായ ഫ്രഷ് ബൈറ്റ്സിന്റെ ശർക്കരവരട്ടിയും കായ വറുത്തതും ഈ തവണത്തെ ഓണം വിപണിയുടെ മാറ്റുകൂട്ടുന്നു. ജില്ലയിൽ 10 സംരംഭകരെ ചേർത്താണ് പദ്ധതി. 100, 250 ​ഗ്രാമുകളുടെ പായ‍്‍ക്കറ്റുകളാണ് വിൽപ്പനയ്‍ക്കെത്തിയിട്ടുള്ളത്. 55 സിഡിഎസുകളിലായി 110 ഓണച്ചന്തകളാണ് നടത്തുന്നത്. ഇതിന് പുറമേയാണ് കട്ടപ്പന ന​ഗരസഭ സിഡിഎസുകളുടെ നേതൃത്വത്തിൽ ജില്ലാ വിപണനമേള. വിദ്യാഭ്യാസ സ്ഥിരംസമിതി അധ്യക്ഷ ഐബിമോൾ രാജൻ ആദ്യ വിൽപ്പന നടത്തി. മനോജ്‌ മുരളി ഏറ്റുവാങ്ങി. 14വരെയാകും പ്രവർത്തനം. കട്ടപ്പന കുടുംബശ്രീ സിഡിഎസ് ഒന്ന്, രണ്ട് ചെയർപേഴ്സൺമാരായ രത്നമ്മ സുരേന്ദ്രൻ, ഷൈനി ജിജി, സിഡിഎസ് അം​ഗങ്ങൾ, വാർഡ് അം​ഗങ്ങൾ, കുടുംബശ്രീ ജില്ലാ പ്രോഗ്രാം മാനേജർമാരായ അശ്വിനി സുബ്രഹ്മണ്യൻ, ചിഞ്ചു വി ചെല്ലം, ലിന്റു മരിയ, മനു സോമൻ തുടങ്ങിയവർ പങ്കെടുത്തു.