നാശം വിതച്ച് മഴ, കാറ്റ്

ജില്ലയിൽ അതിതീവ്രമഴയിലും കാറ്റിലും വ്യാപകനാശം. മാങ്കുളത്ത്‌ ഒഴുക്കിൽപ്പെട്ട്‌ യുവാവ്‌ മരിച്ചു. ആകെ 23 വീടുകളാണ്‌ തകർന്നത്‌. നിരവധി വീടുകളുടെ സംരക്ഷണ ഭിത്തിയിടിഞ്ഞു. മരംവീണ്‌ ലക്ഷങ്ങളുടെ കൃഷിനാശമാണുണ്ടായത്‌. 

ബുധനാഴ്‌ച പുലർച്ചെ മാങ്കുളം താളുങ്കണ്ടംകുടിയിൽ കൈത്തോട്ടിൽ ഒഴുക്കിൽപ്പെട്ട്‌  ഊരുമൂപ്പൻ സുരേഷ് മണിയുടെ മകൻ സുനീഷ് സുരേഷ് (21) മരിച്ചു. ജില്ലയിൽ ശരാശരി 57.06 മില്ലിമീറ്റർ മഴ ലഭിച്ചു.  യഥാക്രമം ദേവികുളം 86.4, പീരുമേട്‌ 58, തൊടുപുഴ 41,  ഉടുമ്പൻചോല 29.8,  ഇടുക്കി 72.08  എന്നിങ്ങനെയാണ്‌ മഴ ലഭിച്ചത്‌. ഉടുമ്പൻചോലയിൽ ഒരു കുടുംബത്തെ മാറ്റിപ്പാർപ്പിച്ചു.