അപകടക്കെണിയാവരുത്‌ 
സുരക്ഷാമതിൽ

ഉദുമ

കാസർകോട് -–- കാഞ്ഞങ്ങാട് സംസ്ഥാനപാതയിലെ കളനാട് റെയിൽവേ മേൽപ്പാലത്തിലെ സുരക്ഷാമതിൽ വാഹനമിടിച്ച് തകരുന്നത് പതിവാകുന്നു. മേൽപ്പാലം അശാസ്‌ത്രീയമായി നിർമിച്ചതെന്ന പരാതി വ്യാപകമാണ്. ഉദുമ ഭാഗത്തുനിന്ന് വരുന്ന വാഹനങ്ങളാണ് കൂടുതൽ അപകടത്തിൽപെടുന്നത്.  രാത്രിയിൽ ചെറിതും വലതുമായ നിരവധി  വാഹനങ്ങളാണ്  മതിലിടിച്ച് മറിയുന്നത്. ഭാഗ്യം കൊണ്ടുമാത്രമാണ് പല വാഹനങ്ങളും പാലത്തിന്‌ മുകളിൽനിന്ന് റെയിൽപാളത്തിലേക്ക് വീഴാതെ രക്ഷപ്പെടുന്നത്. ഇവിടെയുണ്ടായ അപകടത്തിൽ വിദ്യാർഥികൾ ഉൾപ്പെടെ നിരവധി പേർ മരിക്കുകയും പരിക്കേൽക്കുകയും ചെയ്തിട്ടുണ്ട്.

പഴയ മേൽപ്പാലം ഉണ്ടായ സമയത്ത്‌  റോഡിന്റെ ഇരുവശങ്ങളിലും ഹമ്പുകളും സിഗ്നൽ വിളക്കുകളുമുണ്ടായിരുന്നു. അക്കാലത്ത്‌ അപകടവും കുറവായിരുന്നു. കെഎസ്‌ടിപി പാത വന്നതോടെയാണ് ഹമ്പുകൾ നീക്കിയത്. ഉദുമ, കളനാട് ഭാഗങ്ങളിൽനിന്ന്  വേഗതയിൽ വരുന്ന വാഹനങ്ങൾ റെയിൽവേ മേൽപാലത്തിനടുത്ത് എത്തിയാൽ മാത്രമാണ് വളവും മേൽപ്പാലവും കാണുക. ഉടൻ ബ്രേക്ക് അമർത്തുമ്പോൾ നിയന്ത്രണം തെറ്റി മേൽപ്പാലത്തിലെ സുരക്ഷ മതിലിടിച്ച് മറിയും.

കോൺക്രീറ്റിൽ നിർമിച്ച മതിൽ അപകടത്തിൽ തകർന്നാൽ പിന്നീട്  നിർമിക്കുന്നത് സിമന്റ്കട്ട നിരത്തിയാണ്. ഇരുമ്പ് വേലിയും സ്ഥാപിക്കുന്നില്ല. അതിനാൽ വീണ്ടും ഇത്‌ വാഹനമിച്ച്‌ തകരുന്നു. മതിൽ പുനർനിർമിച്ച  ദിവസം രാത്രി തന്നെ ലോറിയിടിച്ച് വീണ്ടും തകർന്നിരുന്നു. വെളിച്ചവും സിഗ്നൽ വിളക്കുകളും ഇല്ലാത്തതാണ്  അപകടം വർധിക്കാൻ കാരണമെന്ന് നാട്ടുകാർ പറയുന്നു.