പ്രവാസി വ്യവസായിയുടെ കൊലപാതകം; 
പ്രതികളെ പൊലീസ്‌ കസ്റ്റഡിയില്‍ വിട്ടു

പ്രവാസി വ്യവസായി പൂച്ചക്കാട്ടെ എം സി അബ്ദുൾ​ ഗഫൂർ ഹാജിയെ(55) കൊലപ്പെടുത്തിയ കേസിൽ റിമാൻഡിൽ കഴിയുന്ന പ്രതികളെ കോടതി 10 ദിവസത്തേക്ക് അന്വേഷണസംഘത്തിന്റെ  കസ്റ്റഡിയിൽ വിട്ടു. ബാര മീത്തൽ മാങ്ങാട്ടെ കെ എച്ച് ഷമീന (ജിന്നുമ്മ–-38), ഭർത്താവ് ഉളിയത്തടുക്ക നാഷണൽ ന​ഗറിലെ ടി എം ഉബൈസ്(38), പൂച്ചക്കാട് മുക്കൂട് ജീലാനി ന​ഗറിലെ പി എം അസ്നിഫ(40), മധൂർ കൊല്യയിലെ ആയിഷ(50) എന്നിവരെയാണ് ഹൊസ്ദുർ​ഗ് ജുഡീഷ്യൽ ഒന്നാംക്ലാസ് മജിസ്ത്രേട്ട്(രണ്ട്) കോടതി കസ്റ്റഡിയിൽ വിട്ടത്. പ്രതികളെ കൂടുതൽ ചോദ്യം ചെയ്യുന്നതിനും തെളിവെടുപ്പുകൾക്കുമായി കസ്റ്റഡിയിൽ കിട്ടണമെന്നാവശ്യപ്പെട്ട് അന്വേഷണ ഉദ്യോഗസ്ഥനായ ജില്ലാ ക്രൈം റെക്കോർഡ്സ് ബ്യൂറോ ഡിവൈഎസ് പി കെ ജെ ജോൺസൺ കോടതിയിൽ അപേക്ഷ നൽകിയിരുന്നു. അബ്ദുൾ ​ഗഫൂർ ഹാജിയിൽനിന്നും പ്രതികൾ തട്ടിയെടുത്ത 596 പവൻ സ്വർണാഭരണത്തിൽ 29 പവൻ മാത്രമാണ് അന്വേഷണ സംഘത്തിന് കണ്ടെടുക്കാനായത്. കാസർകോട് പഴയ ബസ് സ്റ്റാൻഡിന് സമീപത്തെ ജ്വല്ലറിയിൽനിന്നാണ് 29 പവൻ കണ്ടെടുത്തത്. ഭൂരിഭാ​ഗം സ്വർണവും ജില്ലക്കകത്തും പുറത്തുുള്ള വിവിധ ജ്വല്ലറികളിലായി വിൽപ്പന നടത്തിയിട്ടുണ്ട്. ഇവിടങ്ങളിലെല്ലാം  തെളിവെടുപ്പ് നടത്തി മുഴുവൻ സ്വർണവും കണ്ടെടുക്കേണ്ടതുണ്ട്.