പെയ്‌തൊഴിയാതെ

ചട്ടിപ്പറമ്പ്

കുറുവ-–- പഴമള്ളൂർ – ചട്ടിപ്പറമ്പ്- റോഡിൽ പാറക്കെട്ട്‌ ഇടിഞ്ഞുവീണു. വ്യാഴം രാവിലെ പത്തിനായിരുന്നു അപകടം. ഇതുവഴി പോയ ബൈക്ക് മണ്ണിനടിയിൽപ്പെട്ടെങ്കിലും യാത്രക്കാരൻ രക്ഷപ്പെട്ടു. മണ്ണിടിയുന്നത് കണ്ടതോടെ ബൈക്ക് ഉപേക്ഷിച്ച് ഓടിരക്ഷപ്പെടുകയായിരുന്നു. നാട്ടുകാർ ബൈക്ക് പുറത്തെടുത്തു. അപകടസമയം കാൽനട യാത്രക്കാർ ഇല്ലാത്തത് വൻ ദുരന്തമൊഴിവാക്കി. മണ്ണ് നീക്കുന്നതുവരെ വാഹനങ്ങൾ സമൂസപ്പടി – വറ്റലൂർ – ചെറുകുളമ്പിലൂടെയും  പഴമള്ളൂർ സിറ്റി – സഡൻ സിറ്റി – ചാഞ്ഞാലിലൂടെയും തിരിച്ചുവിട്ടു. പെരിന്തൽമണ്ണ തഹസിൽദാർ ടി കെ ഷാജി, കോഡൂർ വില്ലേജ് ഓഫീസർ സി എം രാജേഷ് എന്നിവർ സ്ഥലം സന്ദർശിച്ചു. മുമ്പും ഇവിടെ മണ്ണിടിച്ചിലുണ്ടായിട്ടുണ്ട്. റോഡിന്റെ അപകടാവസ്ഥ പരിഹരിക്കണമെന്നാവശ്യപ്പെട്ട് നാട്ടുകാര്‍ മന്ത്രി പി എ മുഹമ്മദ് റിയാസിന് പരാതി നല്‍കിയിരുന്നു. മന്ത്രിയുടെ നിര്‍ദേശത്തെ തുടര്‍ന്ന് പൊതുമരാമത്ത് അധികൃതര്‍ സ്ഥലം സന്ദര്‍ശിച്ചിരുന്നു.