ജനസൗഹൃദം ആരോഗ്യദൗത്യം

 

മലപ്പുറം 

 ചേർത്തുപിടിച്ചും വിവരങ്ങൾ ചോദിച്ചറിഞ്ഞും ആശ്വസിപ്പിച്ചും ആരോഗ്യമന്ത്രി വീണാ ജോർജ്‌. ‘ആർദ്രം ആരോഗ്യം' പരിപാടിയുടെ ഭാഗമായി  ജില്ലയിലെ ആശുപത്രികൾ സന്ദർശിച്ചു.  തങ്ങളുടെ ആരോഗ്യസൗഖ്യം നേരിട്ടറിയാൻ അരികിലെത്തിയ പ്രിയ മന്ത്രിയെ ജനങ്ങളും സ്‌നേഹത്തോടെ വരവേറ്റു. സാധാരണക്കാർക്ക്‌ സർക്കാർ ആശുപത്രികളിലൂടെ ലഭ്യമായ നൂതന ചികിത്സയ്ക്ക്‌ നന്ദി പറഞ്ഞും പാട്ടുപാടിയും അവർ മന്ത്രിയുമായി  സന്തോഷം പങ്കിട്ടു. 

ആശുപത്രികളിലെ വികസന പ്രവർത്തനങ്ങൾ നേരിട്ട് വിലയിരുത്താനും പോരായ്മകൾ പരിഹരിച്ച് സമയബന്ധിതമായി നടപടി സ്വീകരിക്കാനുമാണ് മന്ത്രിയുടെ സന്ദർശനം. 

ജില്ലയിൽ കൊണ്ടോട്ടി താലൂക്ക് ഹെഡ്ക്വാർട്ടേഴ്‌സ് ആശുപത്രി,  അരീക്കോട് താലൂക്ക് ആശുപത്രി, നിലമ്പൂർ ജില്ലാ ആശുപത്രി, വണ്ടൂർ താലൂക്ക് ആശുപത്രി, പെരിന്തൽമണ്ണ ജില്ലാ ആശുപത്രി, മലപ്പുറം താലൂക്ക് ഹെഡ്ക്വാർട്ടേഴ്‌സ് ആശുപത്രി, കുറ്റിപ്പുറം താലൂക്ക് ആശുപത്രി, പൊന്നാനി താലൂക്ക് ഹെഡ്ക്വാർട്ടേഴ്‌സ് ആശുപത്രി, പൊന്നാനി സ്ത്രീകളുടെയും കുട്ടികളുടെയും ആശുപത്രി, തിരൂർ ജില്ലാ ആശുപത്രി, തിരൂരങ്ങാടി താലൂക്ക് ഹെഡ്ക്വാർട്ടേഴ്‌സ് ആശുപത്രി എന്നിവിടങ്ങൾ സന്ദർശിച്ചു. ആരോഗ്യവകുപ്പ് ഡയറക്ടർ ഡോ. കെ ജെ റീന, ജില്ലാ മെഡിക്കൽ ഓഫീസർ  ആർ രേണുക, എൻഎച്ച്എം ജില്ലാ പ്രോഗ്രം മാനേജർ ഡോ. സി എൻ അനൂപ്, ആരോഗ്യവകുപ്പിലെ മറ്റ് ഉദ്യോഗസ്ഥർ, ജനപ്രതിനിധികൾ എന്നിവർ മന്ത്രിയോടൊപ്പമുണ്ടായിരുന്നു.