തൃശൂർ
റവന്യൂ ജില്ലാ ശാസ്ത്രോത്സവത്തിനും വൊക്കേഷണൽ എക്സ്പോയ്ക്കും ബുധനാഴ്ച തൃശൂരിൽ തുടക്കമാകും. ആറ് വേദികളിലായി നടക്കുന്ന മേളയിൽ 3662 വിദ്യാർഥികളും 97 അധ്യാപകരും മത്സരിക്കും. ചൊവ്വാഴ്ച രാവിലെ പത്തിന് ശാസ്ത്രമേള നടക്കുന്ന ഹോളി ഫാമിലി കോൺവെന്റ് ഗേൾസ് ഹൈസ്കൂളിൽ മന്ത്രി ആർ ബിന്ദു ഉദ്ഘാടനം ചെയ്യും. പി ബാലചന്ദ്രൻ എംഎൽഎ അധ്യക്ഷനാകും.
ഗണിതശാസ്ത്രമേള സേക്രഡ്‌ ഹാർട്ട്‌ സിജിഎച്ച്എസ്എസിലും സാമൂഹ്യമേള സിഎംഎസ്എച്ച്എസ്എസിലും നടക്കും. തൃശൂർ ഗവ. മോഡൽ ബോയ്സ് ഹയർസെക്കൻഡറി സ്കൂളിലാണ് ഐടി മേള. പ്രവൃത്തി പരിചയമേള കാൽഡിയൻ സിറിയൻ എച്ച്എസ്എസിലും വൊക്കേഷണൽ എക്‌സ്‌പോ ഗവ. മോഡൽ ഗേൾസ് വിച്ച്എച്ച്‌എസിലും നടക്കും. വൊക്കേഷണൽ എക്സ്പോയിലും പ്രവൃത്തി പരിചയമേളയിലും ഒഴികെ ബാക്കി വിഭാഗങ്ങളിൽ അധ്യാപകർക്ക് മത്സരമുണ്ടാകും.
തൃശൂർ, ഇടുക്കി ജില്ലകളിലെ 52 വൊക്കേഷണൽ ഹയർസെക്കൻഡറി സ്കൂളുകളിലെ വിദ്യാർഥികൾ പാഠ്യപദ്ധതിയുടെ ഭാഗമായി ഉൽപ്പാദന സേവനകേന്ദ്രങ്ങളിൽ നിർമിക്കുന്ന ഉൽപ്പന്നങ്ങളുടെയും സേവനങ്ങളുടെയും പ്രദർശനവും വിൽപ്പനയും വൊക്കേഷണൽ എക്സ്പോയിലുണ്ടാകും. എൻജിനിയറിങ്, ഐടി, അഗ്രികൾച്ചർ, പാരാമെഡിക്കൽ, ആനിമൽ ഹസ്ബെന്ററി, ഫിഷറീസ്, കൊമേഴ്സ്, ബിസിനസ്, ട്രാവൽ ആൻഡ് ടൂറിസം, ഫാഷൻ ടെക്നോളജി, കോസ്മെറ്റോളജി തുടങ്ങിയ മേഖലകളിലെ 60 ഓളം സ്റ്റാളുകളുണ്ടാകും.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
