കൊച്ചി> മുതിർന്ന സംഗീതസംവിധായകനിൽ നിന്നും ദുരനുഭവമുണ്ടായെന്ന് തുറന്നുപറഞ്ഞ ഗായിക ഗൗരി ലക്ഷ്മിക്ക് പിന്തുണയുമായി ഗായകൻ ഷഹബാസ് അമൻ. ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെയായിരുന്നു ഗൗരിയുടെ വെളിപ്പെടുത്തൽ.
ഗൗരി ഉന്നയിച്ച കാര്യങ്ങൾ ഗൗരവമായി കണക്കിലെടുക്കണമെന്നും, അവർ ഉദ്ദേശിക്കുന്നുവെങ്കിൽ ആ പേര് പുറത്തു വരണം എന്നുമായിരുന്നു ഷഹബാസ് സമൂഹമാധ്യമത്തിൽ കുറിച്ചത്. നേരത്തെ താനനുഭവിച്ച മുറിവുകൾ തുറന്നു പറഞ്ഞതിന്റെ പേരിൽ ഗൗരി നേരിട്ട സൈബറാക്രമണങ്ങൾ കൂടി കണക്കിലെടുക്കണമെന്നും ഷഹബാസ് കുറിപ്പിൽ പറയുന്നുണ്ട്.
താൻ ഗോഡ് ഫാദറിനെ പോലെ കണ്ടയാളിൽ നിന്നാണ് ഇത്തരം അനുഭവമുണ്ടായതെന്ന് ഗൗരി പറഞ്ഞിരുന്നു. അവസരം ലഭിക്കണമെങ്കിൽ വിട്ടുവീഴ്ചയ്ക്കു തയ്യാറാകണമെന്ന് ആവശ്യപ്പെട്ടതോടെ, ഇനി മേലിൽ ആ സംഗീത‍‍ജ്ഞനു വേണ്ടി പാടില്ലെന്നു തീരുമാനിച്ചതായും അവർ പറഞ്ഞു.
ഇതിനു പിന്നാലെയാണ് ഗൗരിക്കു പിന്തുണയുമായി ഷഹബാസ് അമൻ എത്തിയത്. ഒരു പെൺകുട്ടിയുടെ ധീരമായ മുന്നോട്ട് പോക്കിന് യാതൊന്നും തടസമാകരുതെന്നും അദ്ദേഹം കൂട്ടിച്ചേർത്തു. സമൂഹമാധ്യമങ്ങളിൽ ഷഹബാസ് പങ്കുവെച്ച വാക്കുകൾ ശ്രദ്ധേയമായിരിക്കുകയാണ്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
