പാലക്കാട്> ഷാജ് കിരണുമായുള്ള ശബ്‌ദ സംഭാഷണം സ്വപ്ന സുരേഷ് പുറത്തുവിട്ടു. പാലക്കാട് സ്വപ്ന ജോലി ചെയ്യുന്ന എച്ച്ആർഡിഎസ് ഓഫീസിൽ വിളിച്ചുചേർത്ത വാർത്താ സമ്മേളനത്തിലാണ് ഒന്നര മണിക്കൂർ നീളമുള്ള സംഭാഷണം പുറത്തുവിട്ടത്.
ഷാജ് കിരണമായി വർഷങ്ങളായി ബന്ധമുണ്ടെന്ന് സ്വപ്ന വാർത്താസമ്മേളനത്തിൽ പറഞ്ഞു. കോടതിയിൽ രഹസ്യമൊഴി നൽകിയ ശേഷം നിർബന്ധമായി കാണണമെന്ന് ഷാജ് പറഞ്ഞിരുന്നു. അതനുസരിച്ചാണ് രഹസ്യമൊഴി നൽകിയ ശേഷം ഷാജ് കൊച്ചിയിൽ വച്ച് നേരിട്ടുകണ്ടത്. സരിത്തിനെ നാളെ പൊക്കുമെന്ന് ഷാജ് പറഞ്ഞു. അതുപോലെ സരിത്തിനെ പിറ്റേന്ന് തട്ടിക്കൊണ്ടുപോയി. അതുകൊണ്ടാണ് ഷാജ് കിരണിനെ വിളിച്ച് സഹായം അഭ്യർത്ഥിച്ചതെന്നും സ്വപ്ന പറഞ്ഞു.
എന്നാൽ താൻ ആരോടാണ്‌ കളിക്കുന്നതെന്നും താൻ അകത്ത്‌ പോയാൽ മകനെ നഷ്‌ടപ്പെടുമെന്നും ഷാജ് ഭീഷണിപ്പെടുത്തി. ഷാജ് ഭീഷണിപ്പെടുത്തിയതിനെ തുടർന്നാണ്‌ ഷാജിനെ വിളിച്ചുവരുത്തിയതും ആ സംഭാഷണം റെക്കോർഡ് ചെയ്‌ത‌തും
താൻ എച്ച്ആർഡിഎസിനെയും സരിത്തിനെയും തള്ളിപ്പറഞ്ഞത് ഷാജിന്റെ വിശ്വാസം നേടാനായിരുന്നു. ശബ്‌ദരേഖയിൽ താൻ ഇവരെയെല്ലാം തള്ളിപറയുന്നത് എല്ലാവർക്കും കേൾക്കാമെന്നും സ്വപ്ന പറഞ്ഞു. തന്റെ കുഞ്ഞിനെ നഷ്ടപ്പെടാതിരിക്കുന്നതിന് വേണ്ടിയാണ് ഇത് ചെയ്‌തതെന്നും സ്വപ്ന പറഞ്ഞു.
വിജിലൻസ്‌ മേധാവിയെ മാറ്റി
വിജിലൻസ്‌ ഡയറക്ടർ സ്ഥാനത്തുനിന്ന്‌ എഡിജിപി എം ആർ അജിത്കുമാറിനെ മാറ്റി. ഐജി എച്ച്‌ വെങ്കിടേഷിനാണ്‌ പകരം ചുമതല. അജിത്കുമാറിന്‌ പുതിയ പദവി നൽകിയിട്ടില്ല. സ്വർണക്കടത്ത്‌ കേസിലെ പ്രതി സ്വപ്ന സുരേഷിന്റെ സുഹൃത്ത്‌ ഷാജ് കിരണുമായി ഇദ്ദേഹം ഫോണിൽ സംസാരിച്ചിരുന്നതായി വാർത്തകളുണ്ടായിരുന്നു. മുഖ്യമന്ത്രിയുടെ നിർദേശപ്രകാരമാണ്‌ ഇദ്ദേഹത്തെ സ്ഥാനത്തുനിന്ന്‌ മാറ്റിനിർത്തിയത്‌.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
