ഷില്ലോങ്
മേഘാലയയിൽ ക്രിസ്ത്യൻ പള്ളിയിൽ കയറി ജയ്ശ്രീറാം മുഴക്കി യുവാവ്. സുഹൃത്തുക്കള്‍ക്കൊപ്പം മൗലന്‍നോങ് എപിഫെനിയിലെ ക്രിസ്ത്യൻ പള്ളിയിൽ കയറിയാണ് സമൂഹമാധ്യമ ഇൻഫ്ലുവന്‍സറായ ആകാശ് സാഗര്‍ ജയ്ശ്രീറാം മുഴക്കി റീല്‍ ഷൂട്ട് ചെയ്ത് ഇൻസ്റ്റഗ്രാമിൽ പോസ്റ്റുചെയ്തത്. അള്‍ത്താരയ്ക്ക് മുന്നിലെത്തി അവിടത്തെ മൈക്ക് ഉപയോഗിച്ചാണ് ജയ് ശ്രീറാം മുഴക്കുകയും രാമഭക്തിഗാനം ആലപിക്കുകയും ചെയ്തത്. ഇതിന്റെ വീഡിയോ പുറത്തുവന്നതോടെ വ്യാപക പ്രതിഷേധമുയര്‍ന്നു.
സാമൂഹ്യ പ്രവര്‍ത്തക നൽകിയ പരാതിയിൽ ആകാശിനെതിരെ അതിക്രമിച്ച് കടക്കൽ, സൗഹാർദം തകർക്കൽ, മതവിശ്വാസങ്ങളെ അവഹേളിക്കൽ തുടങ്ങിയ വകുപ്പുകള്‍ പ്രകാരം പൊലീസ് കേസെടുത്തു. ഇൻസ്റ്റഗ്രാമിൽ 15 ലക്ഷം പേരാണ് ആകാശിനെ പിന്തുടരുന്നത്. അതേസമയം കേസെടുത്ത നടപടിക്കെതിരെ ആകാശ് രംഗത്ത് എത്തി. ജയ് ശ്രീറാം എന്നുവിളിച്ചതിനാണോ കേസ് എന്ന ചോദിച്ച ആകാശ് മസ്ജിദിൽ മതപരമായ മുദ്രാവാക്യം വിളിച്ചയാള്‍ക്കെതിരായ കേസ് റദ്ദാക്കിയ കര്‍ണാടക ഹൈക്കോടതി നടപടിയും ചൂണ്ടിക്കാട്ടി.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
