ഭോപ്പാൽ
മധ്യപ്രദേശില്‍ വെടിയേറ്റുമരിച്ച ആദിവാസി യുവാവ് കിടന്ന കിടക്കയിലെ രക്തം ഗര്‍ഭിണിയായ ഭാര്യയെ കൊണ്ട് വൃത്തിയാക്കിച്ച സര്‍ക്കാര്‍ ആശുപത്രി ജീവനക്കാരുടെ നടപടിയില്‍ വ്യാപകരോഷം ഉയരുന്നു. ദിൻഡോരി ജില്ലയിലെ ഗദസാരായി പ്രാഥമികാരോഗ്യകേന്ദ്രത്തിലെ ജീവനക്കാരുടെ ക്രൂര നടപടിയുടെ വീഡിയോ പുറത്തുവന്നതോടെ സംസ്ഥാനം ഭരിക്കുന്ന ബിജെപി സര്‍ക്കാരിനെതിരെ ജനവികാരം ശക്തമായി.
വ്യാഴാഴ്ച രാത്രി ലാൽപുര്‍ ഗ്രാമത്തിൽ ഭൂമി തര്‍ക്കത്തെ തുടര്‍ന്നാണ് ശിവരാജിനും (40) സഹോദരൻ രഘുരാജിനും (28) ഇവരുടെ അച്ഛൻ ധരംസിങ്ങിനും (65) വെടിയേറ്റത്. ആശുപത്രിയിലെത്തിച്ചെങ്കിലും മൂവരും മരിച്ചു. ശിവരാജിന്റെ മറ്റൊരു സഹോദരൻ രാംരാജ് ഗുരുതര പരിക്കോടെ മറ്റൊരു ആശുപത്രിയിലാണ്. ശിവരാജിന്റെ മൃതദേഹം മാറ്റിയപ്പോഴാണ് കിടക്കയിലെ രക്തം തുടയ്ക്കാന്‍ ഭാര്യ റോഷ്നിയോട് അധികൃതര്‍ നിര്‍ദേശിച്ചത്.
ഒരു കൈയിൽ രക്തം പുരണ്ട തുണിയും പിടിച്ചുനിൽക്കുന്ന റോഷ്നിക്ക് ജീവനക്കാരായ സ്ത്രീകള്‍ തുടക്കാനായി തുണി കിടക്കയിലിട്ടുകൊടുക്കുന്നതും കിടക്ക പൂര്‍ണമായും വൃ-ത്തിയാക്കാൻ നിര്‍ദേശിക്കുന്നതും വീഡിയോയിൽ കാണാം. സംഭവത്തിന് ഉത്തരവാദികളായ ജീവനക്കാർക്കെതിരെ നടപടിയെടുത്തെന്ന് ജില്ലാ മെഡിക്കൽ ഓഫീസർ അറിയിച്ചു
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
