മസ്‌കത്ത്‌ > അൽ വുസ്ത ഗവർണറേറ്റിലെ വിലായത്ത് ഹൈമയിലെ അറേബ്യൻ ഒറിക്സ് സാങ്ച്വറിയിലേക്ക് 2024 ൻ്റെ തുടക്കം മുതൽ സന്ദർശകരുടെ എണ്ണം 1,300 കവിഞ്ഞതായി അറേബ്യൻ ഒറിക്സ് ഡിപ്പാർട്ട്‌മെൻ്റ് ഡയറക്ടർ സുൽത്താൻ മുഹമ്മദ് അൽ ബലൂഷി പറഞ്ഞു.
വന്യജീവി സംരക്ഷണത്തിനുള്ള ഒരു കേന്ദ്രമാണ് അറേബ്യൻ ഒറിക്സ് റിസർവ്. ഇക്കോ ടൂറിസം പ്രോത്സാഹിപ്പിക്കുന്നതിലൂടെ ഒമാൻ്റെ പ്രകൃതിചരിത്രവുമായി ബന്ധപ്പെടുത്തി സാമ്പത്തിക വികസനത്തിൻ്റെ ചാലകമായാണ് ഇത് പ്രവർത്തിക്കുന്നത്.
2,824 ചതുരശ്ര കിലോമീറ്റർ വിസ്തൃതിയിൽ വ്യാപിച്ചുകിടക്കുന്ന അറേബ്യൻ ഓറിക്‌സ് സാങ്ച്വറിയിൽ ഏകദേശം 900 അറേബ്യൻ ഓറിക്‌സ് ഉൾപ്പെടുന്നു. 1,240 മണൽ ഗസലുകളും 160 അറേബ്യൻ ഗസലുകളും കൂടാതെ നൂബിയൻ ഐബെക്‌സ്, സാൻഡ് ഫോക്‌സ്, വരയുള്ള ഹൈന, കാട്ടുമുയൽ, തേൻ ബാഡ്ജർ എന്നിവയും ഉൾപ്പെടുന്നു. കഴിഞ്ഞ ഏപ്രിലിൽ 50 മണൽ ഗസലുകളെ റിസർവിലേക്ക് തുറന്നുവിട്ടു, ഇത് മേഖലയിലെ ജൈവവൈവിധ്യത്തിൻ്റെ സുസ്ഥിരത വർദ്ധിപ്പിച്ചു.
ആവാസവ്യവസ്ഥയെ നിലനിർത്തുക എന്ന ലക്ഷ്യത്തോടെ സസ്യങ്ങളുടെ വളർച്ച വർദ്ധിപ്പിക്കുന്നതിനും പ്രകൃതിദത്ത ആവാസവ്യവസ്ഥയെ പുനരുജ്ജീവിപ്പിക്കുന്നതിനുമുള്ള പരിപാടിയുടെ ഭാഗമായി 80,000 കാട്ടുമരങ്ങൾ നട്ടുപിടിപ്പിക്കുന്ന പദ്ധതി വിഭാവനം ചെയ്തിട്ടുണ്ട്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
