ദുബായ് > യുഎഇയും ചൈനയും തമ്മിലുള്ള ഉഭയകക്ഷി ബന്ധം ശക്തമാക്കും. യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം ചൈനീസ് പൊളിറ്റ് ബ്യൂറോയിലെ പ്രധാന അംഗവും ടിയാൻജിനിലെ കമ്മ്യൂണിസ്റ്റ് പാർട്ടി സെക്രട്ടറിയുമായ ചെൻ മൈനറുമായി ഇത്‌ സംബന്ധിച്ച് ചർച്ച നടത്തി.
യുഎഇയും ചൈനയും തമ്മിലുള്ള ശക്തവും വൈവിധ്യപൂർണ്ണവുമായ ബന്ധത്തെക്കുറിച്ച് ഷെയ്ഖ് മുഹമ്മദ് എടുത്തുപറഞ്ഞു. രാഷ്ട്രീയ, സാമ്പത്തിക, സാംസ്കാരിക, വികസന മേഖലകളിൽ തങ്ങളുടെ തന്ത്രപരമായ പങ്കാളിത്തം ആഴത്തിലാക്കാനുള്ള അവരുടെ പ്രതിബദ്ധത അദ്ദേഹം വ്യക്തമാക്കി.
യുഎഇ പ്രസിഡൻ്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ്റെയും ചൈനീസ് പ്രസിഡൻ്റ് ഷി ജിൻപിംഗിൻ്റെയും നേതൃത്വത്തിൽ യുഎഇ - ചൈന ബന്ധത്തിൽ തുടർച്ചയായ വളർച്ചയുണ്ടെന്ന് ഷെയ്ഖ് മുഹമ്മദ് ചൂണ്ടിക്കാട്ടി. നിക്ഷേപം, വ്യവസായം, സാങ്കേതികവിദ്യ, ശുദ്ധ ഊർജം എന്നിവയിൽ സഹകരണം വിപുലീകരിക്കുന്നതിനുള്ള വഴികളും ഇരുപക്ഷവും പരിശോധിച്ചു. ആഗോള സംഭവവികാസങ്ങൾ, പ്രത്യേകിച്ച് പശ്ചിമേഷ്യയിലെ സംഭവവികാസങ്ങൾ ഇരുവരും ചർച്ച ചെയ്യുകയും മേഖലയിൽ സമാധാനവും സ്ഥിരതയും കൈവരിക്കുന്നതിനുള്ള തീവ്രശ്രമങ്ങളുടെ ആവശ്യകത ഊന്നിപ്പറയുകയും ചെയ്തു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
