ലണ്ടൻ> ആറാം ദേശീയ സമ്മേളനത്തിനുള്ള തയ്യാറെടുപ്പിനിടയിൽ സമീക്ഷ യുകെ ലെസ്റ്ററിൽ പുതിയ ബ്രാഞ്ച് ആരംഭിച്ചു. മാർച്ച്‌ 19 ഞായറാഴ്‌ച സമീക്ഷ യുകെ നാഷണൽ പ്രസിഡന്റ്‌ ശ്രീകുമാർ ഉള്ളപ്പിള്ളിൽ ലെസ്റ്റർ ബ്രാഞ്ച് ഉദ്ഘാടനം ചെയ്യ്തു. പുതിയ ബ്രാഞ്ചിന് ആശംസകൾ അർപ്പിച്ചുകൊണ്ട് നാഷണൽ കമ്മിറ്റി മെമ്പർമാരായ സ്വപ്ന പ്രവീൺ, അഡ്വ. ദിലീപ് കുമാർ, ഏരിയ സെക്രട്ടറി പ്രവീൺ രാമചന്ദ്രൻ എന്നിവർ സംസാരിച്ചു.
സമ്മേളനം പതിനൊന്നു പേരടങ്ങുന്ന എക്‌സിക്യൂട്ടീവ് കമ്മിറ്റിയെ തെരഞ്ഞെടുത്തു. സെക്രട്ടറിയായി ബൈജു കുര്യാക്കോസിനെയും പ്രസിഡന്റായി ബിജു ജോസഫിനെയും തെരഞ്ഞെടുത്തു. ട്രഷറർ ആയി സുബി ചാക്കോയെയും, ജോയിന്റ് സെക്രട്ടറിയായി ഫെബിൻ പൊട്ടയിലിനേയും വൈസ് പ്രസിഡന്റായി അയന വർഗീസിനെയും യോഗം തെരഞ്ഞെടുത്തു.
നാട്ടിൽ നിന്നും എത്തുന്ന വിദ്യാർത്ഥികൾ നേരിടുന്ന പ്രശനങ്ങളും, ബ്രാഞ്ചിന്റെ മുൻപോട്ടുള്ള പ്രവർത്തനങ്ങളും യോഗം ചർച്ച ചെയ്തു. പീറ്റർബോറോയിൽ വച്ചു നടക്കുന്ന ദേശീയ സമ്മേളനത്തിന് പൂർണ്ണ പിന്തുണ അറിയിക്കുകയും, സമ്മേളന പ്രധിനിധികളെ തെരഞ്ഞെടുക്കുകയും ചെയ്തു. ഫെബിന്റെ അധ്യക്ഷതയിൽ ചേർന്ന യോഗം സെക്രട്ടറി ബിജുവിന്റെ സ്വാഗതപ്രസംഗത്തോടെയാണ് ആരംഭിച്ചത്. ബ്രാഞ്ച് ട്രഷറർ സുബി ചാക്കോ നന്ദി പറഞ്ഞുകൊണ്ട് യോഗനടപടികൾ അവസാനിപ്പിച്ചു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
