ചിക്കാഗോ > പ്രശസ്ത സംഗീത സംവിധായകനും പ്രൊഡ്യൂസറും ഗാനരചയിതാവുമായ ക്വിൻസി ജോൺസ് (91) അന്തരിച്ചു. ഞായർ രാത്രി ലോസ് ഏഞ്ചൽസിലെ വസതിയിൽ വച്ചായിരുന്നു അന്ത്യമെന്ന് ജോൺസിന്റെ അടുത്ത വൃത്തങ്ങൾ അറിയിച്ചു. മെക്കിൾ ജാക്സന്റെ പ്രശസ്ത സംഗീത ആൽബമായ ത്രില്ലറിന്റെ ഉൾപ്പെടെ പ്രൊഡ്യൂസറാണ്. ഫ്രാങ്ക് സിനാത്ര, റേ ചാൾസ് എന്നിവർക്കൊപ്പമാണ് ക്വിൻസി ത്രില്ലർ നിർമിച്ചത്.
റൂട്ട്സ്, ഹീറ്റ് ഓഫ് ദ നൈറ്റ്, വീ ആർ ദ വേൾഡ് എന്നിവ പ്രശസ്തമായ സൃഷ്ടികളാണ്. മെക്കിൾ ജാക്സണൊപ്പം ത്രില്ലർ, ഓഫ് ദി വാൾ, ബാഡ് എന്നിവ നിർമിച്ചു. മൈക്കിൾ ജാക്സണെ ലോകപ്രശസ്തനാക്കുന്നതിൽ നിർണായക പങ്കു വഹിച്ച വ്യക്തിയായിരുന്നു ജോൺസ്. ബില്ലി ജീൻ, ബീറ്റ് ഇറ്റ് എന്നിങ്ങനെയുള്ള ജാക്സന്റെ പ്രശസ്ത ഗാനങ്ങളൊരുക്കിയത് ക്വിൻസിയായിരുന്നു.
75 വർഷത്തോളം നീണ്ട കരിയറിൽ ക്വിൻസിക്ക് 28 ഗ്രാമി അവാർഡുകൾ ലഭിച്ചു. 79 തവണ ഗ്രാമി പുരസ്കാരത്തിനു നാമനിർദ്ദേശം ചെയ്യപ്പെട്ടു. 7 ഓസ്കാർ നാമനിർദ്ദേശം ലഭിച്ചിട്ടുള്ള ക്വിൻസി ഏറ്റവും കൂടുതൽ തവണ ഓസ്കാറിനു നിർദ്ദേശിക്കപ്പെട്ട ആഫ്രിക്കൻ വംശജരിലൊരാളാണ്. 20ാം നൂറ്റാണ്ടിൽ ലോകത്തെ ഏറ്റവുമധികം സ്വാധീനിച്ച ജാസ് സംഗീതജ്ഞൻ എന്ന് ടൈം മാഗസിൻ ക്വിൻസിയെ വിശേഷിപ്പിച്ചു. 50 ഓളം സിനിമകൾക്കും ടെലിവിഷൻ പരമ്പരകൾക്കും സംഗീതമൊരുക്കിയിട്ടുണ്ട്.ക്യൂ (Q) എന്ന പേരിൽ 2001ൽ ആത്മകഥ പുറത്തിറക്കി. പുസ്തകത്തിന്റെ ഓഡിയോ പതിപ്പിന് 2002ലെ ബെസ്റ്റ് സ്പോക്കൺ വേൾഡ് ആൽബത്തിനുള്ള ഗ്രാമി അവാർഡ് ലഭിച്ചു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
