സ്റ്റോക്‌ഹോം > 2024 ലെ സാഹിത്യത്തിനുള്ള നൊബേൽ ദക്ഷിണ കൊറിയൻ എഴുത്തുകാരി ഹാൻ കാങിന്. ചരിത്രത്തിലാദ്യമായാണ്‌ സാഹിത്യത്തിൽ ദക്ഷിണ കൊറിയ നൊബേൽ നേടുന്നത്‌. ചരിത്രപരമായ ആഘാതങ്ങളെ അഭിമുഖീകരിക്കുകയും മനുഷ്യ ജീവിതത്തിന്റെ ദുർബലത തുറന്നുകാട്ടുകയും ചെയ്യുന്നു ഹാൻ കാങിന്റെ രചനകൾ എന്നതാണ്‌ അവരെ പുരസ്കാരത്തിന് അർഹയാക്കിയതെന്ന്‌ നൊബേൽ സമ്മാന സമിതി പറഞ്ഞു.
1970ൽ ദക്ഷിണ കൊറിയയിലെ ഗ്വാങ്ജുവിലാണ് ഹാൻ കാങ് ജനിച്ചത്. 1993ൽ മുൻഹാക് -ഗ്വാ- സാഹോയിൽ (സാഹിത്യവും സമൂഹവും) "വിന്റർ ഇൻ സിയോൾ" എന്ന കവിതാ സമാഹാരം പ്രസിദ്ധീകരിച്ചുകൊണ്ടാണ്‌ ഹാൻ കാങ് സാഹിത്യലോകത്തിലേക്ക്‌ കടന്നുവരുന്നത്. അഞ്ച് കവിതകളാണ്‌ ഈ സമാഹാരത്തിൽ ഉൾപ്പെട്ടിരുന്നത്‌. പിന്നീട്‌ റെഡ് ആങ്കർ, യെയോസു, ഫ്രൂട്ട്സ് ഓഫ് മൈ വുമൺ (2000), യുവർ കോൾഡ്‌ ഹാൻഡ്‌സ്‌ (2002), ദി വെജിറ്റേറിയൻ (2007), ബ്രെത്ത് ഫൈറ്റിംഗ് (2010), ഗ്രീക്ക് ലെസൺസ് (2011), ഹ്യൂമൻ ആക്റ്റ്സ് (2014), ദി വൈറ്റ് ബുക്ക് (2016), തുടങ്ങിയ നോവലുകളും ഐ പുട്ട് ദി ഈവനിംഗ് ഇൻ ദ ഡ്രോയർ (2013) എന്ന കവിതാസമാഹാരവും പ്രസിദ്ധീകരിച്ചു. ദി വെജിറ്റേറിയൻ എന്ന പുസ്തകത്തിന്‌ 2016 ലെ അന്താരാഷ്ട്ര ബുക്കർ പ്രൈസ്‌ ലഭിച്ചിരുന്നു. ബുക്കറും ദക്ഷിണ കൊറിയ ആദ്യമായി നേടുന്നത്‌ ഹാൻ കാങിലൂടെയാണ്‌.
'ഐ ഡു നോട്ട് ബിഡ് ഫെയർവെൽ' ആണ്‌ ഹാൻ കാങിന്റെ ഏറ്റവും പുതിയ നോവൽ. ഈ കൃതി 2023ൽ ഫ്രാൻസിൽ മെഡിസിസ് പുരസ്‌കാരവും 2024ൽ എമിൽ ഗൈമെറ്റ് പുരസ്‌കാരവും കരസ്ഥമാക്കിയിരുന്നു.
വന്യമായ തുറന്നെഴുത്ത്
"മനുഷ്യര്‍ മരങ്ങളാകേണ്ടിയിരുന്നു എന്നാണെനിക്ക് തോന്നുന്നത്' കൊറിയൻ കവി യി സാങ്ങിന്റെ കവിതയിലെ ഈ വരികള്‍ കോളേജ് കാലത്തേ തന്നെ ഏറെ സ്വാധീനിച്ചെന്ന് ഹാൻ കാങ് കുറിച്ചിട്ടുണ്ട്. ജാപ്പനീസ് കോളിനിവാഴ്ചക്കാലത്തെ കെടുതികള്‍ക്കെതിരായ കൊറിയന്‍ ചെറുത്തുനില്‍പ്പിന്റെ പ്രതീകമായിട്ടാണ് അവര്‍ ഈ വരികളെ കണ്ടത്. ഇംഗ്ലീഷിലേക്ക് പരിഭാഷചെയ്യപ്പെട്ട അവരുടെ ആദ്യ നോവല്‍ "വെജിറ്റേറിയൻ' പങ്കുവച്ചതും ചെറുത്തുനില്‍പ്പിന്റെ ഇതേ ഊര്‍ജം. 2016ല്‍ മാന്‍ ബൂക്കര്‍ അന്താരാഷ്ട്ര പുരസ്‌കാരം നേടിയ ഈ കൃതിയിലൂടെയാണ് ഹാൻ കാങ് അന്താരാഷ്ട്ര പ്രശസ്തയായത്.
മലയാളത്തിന്റെ പ്രിയപ്പെട്ട എഴുത്തുകാരനായ സി വി ബാലകൃഷ്ണൻ "വെജിറ്റേറിയൻ' മലയാളത്തിൽ മൊഴിമാറ്റം ചെയ്തിട്ടുണ്ട്. മനുഷ്യരുടെ തൃഷ്ണകളും ഹിംസാത്മകതയും രതിഭാവനകളും സമ്യക്കായി സമ്മേളിച്ച സ്വപ്‌നസദൃശമായ അസാധാരണമായ ആവിഷ്‌ക്കാരമെന്നാണ് സി വി ബാലകൃഷ്ണൻ കൃതിയെ വിശേഷിപ്പിച്ചത്. വന്യമായ തുറന്നെഴുത്താണ് അവരുടെ രചനകളുടെ മുഖമുദ്ര.
കാവ്യാത്മകവും പരീക്ഷണാത്മകവുമായ സമകാലീന ഗദ്യ ശൈലിയാണ് ഹാന്‍ കാങ്ങിന്റേതെന്ന് നൊബേല്‍ പുരസ്കാര നിര്‍ണയ സമിതി വിലയിരുത്തുന്നു.
ഹാൻ സ്യൂങ്-വോൻ എന്ന കൊറിയൻ സാഹിത്യകാരന്റെ മകളാണ് ഹാൻ കാങ്. പുസ്തകങ്ങളുടെ അന്തരീക്ഷത്തിലായിരുന്നു ബാല്യകാലം. കുട്ടിക്കാലം മുതല്‍ പിടികൂടിയ രോഗാവസ്ഥകളാണ് തന്നെ എഴുത്തുകാരിയും നല്ലൊരു വ്യക്തിയുമാക്കിയതെന്നും ഹാന്‍ കാങ് പറഞ്ഞിട്ടുണ്ട്. സംഗീതത്തിലും ചിത്രരചനയിലും അവര്‍ കഴിവ് തെളിയിച്ചിട്ടുണ്ട്.ഫ്രൂട്സ് ഓഫ് മൈ വുമൻ , ഫയർ സലമാണ്ടെർ , ദി ബ്ലാക്ക്‌ ഡീർ, യുവർ കോൾഡ്‌ ഹാൻഡ്‌, ഗ്രീക്ക് ലെസ്സൻസ്, ഹുമൻ ആക്ട്‌സ്, വൈറ്റ് ബുക്ക് എന്നിവയാണ് മറ്റ് പ്രധാന കൃതികള്‍. പുതിയ നോവൽ, വീ ഡു നോട്ട് പാർട് അടുത്തവര്‍ഷം പുറത്തിറങ്ങും."ബേബി ബുദ്ധ" എന്ന ലഘുനോവലും വെജിറ്റേറിയനും ചലച്ചിത്രങ്ങളായി.
ഫ്രഞ്ച് എഴുത്തുകാരിയായ ആനി എർണാക്‌സിന് (2022) ശേഷം സാഹിത്യനൊബേല്‍ നേടുന്ന വനിതയാണ് ഹാൻ.ഭാവിയിലേക്ക്‌ പുസ്തകം പ്രസിദ്ധീകരിക്കുന്ന, നോർവീജിയയുടെ ‘ഫ്യൂച്ചർ ലൈബ്രറി’ പ്രോജക്ടിലേക്ക്‌ ഇവർ നോവൽ സംഭാവന ചെയ്തിട്ടുണ്ട്. 2114ലാണ്‌ പുസ്തകം പ്രസിദ്ധീകരിക്കുക. 2019ൽ സംഭാവന ചെയ്ത പുസ്തകം അതുവരെ ഓസ്ലോയിലെ ലൈബ്രറിയിൽ സൂക്ഷിക്കും.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
