ഗ്രാമം നിറഞ്ഞു; ആശങ്കയും
Thursday Jul 22, 2021
എസ് പ്രദീപ്കുമാര്ഒളിമ്പിക്സ് ഗ്രാമം നിറയുകയാണ്‌. ലോകത്തിന്റെ വിവിധ ഭാഗങ്ങളിലുള്ള അത്‌ലീറ്റുകൾ വന്നുകൊണ്ടേയിരിക്കുന്നു. എല്ലാവർക്കും മാസ്‌കുണ്ട്‌. അതിനാൽ മുഖത്തെ ആശങ്ക തിരിച്ചറിയാൻ കഴിയുന്നില്ല.
നീന്തൽമത്സരം നടക്കുന്നത്‌ ടോക്യോ അക്വാറ്റിക്‌ സെന്ററിലാണ്‌. ഇന്നലെ കൂടുതൽ സമയവും അവിടെയായിരുന്നു. രാവിലെയും വൈകിട്ടും പരിശീലനം. സജൻ പ്രകാശിനൊപ്പം ശ്രീഹരി നടരാജും മാനാ പട്ടേലുമാണ്‌ ഇന്ത്യക്കായി മത്സരിക്കുന്നത്‌. മൂന്നുപേരും ഉത്സാഹത്തിലാണ്‌. സജൻ 200 മീറ്റർ ഫ്രീസ്‌റ്റൈലിൽനിന്ന്‌ പിന്മാറി. 200 മീറ്റർ ബട്ടർഫ്ലൈയിൽ ശ്രദ്ധകേന്ദ്രീകരിക്കാനാണ്‌. നല്ല പ്രകടനം പ്രതീക്ഷിക്കുന്നു.
ഗംഭീര നീന്തൽക്കുളമാണ്‌. എല്ലാ സൗകര്യങ്ങളോടുംകൂടി മനോഹരമായി സജ്ജീകരിച്ചിട്ടുണ്ട്‌. ഇന്ത്യൻ സംഘത്തിന്റെ യോഗമുണ്ടായിരുന്നു. ഇന്നത്തെ ഉദ്‌ഘാടനച്ചടങ്ങിൽ എല്ലാ കായികതാരങ്ങളും പങ്കെടുക്കേണ്ടെന്ന്‌ തീരുമാനിച്ചു. കോവിഡിന്റെ കാര്യത്തിൽ കാര്യമായ ശ്രദ്ധവേണമല്ലോ.
ടോക്യോയില്‍നിന്ന് നീന്തല്‍കോച്ച് എസ് പ്രദീപ്കുമാര്‍