ഹോക്കിയിൽ ജീവൻ വീണ്ടെടുക്കുന്നു

Wednesday Jul 28, 2021

രുപീന്ദർപാൽ image credit olympics.com

ടോക്യോ
ക്വാർട്ടർ പ്രതീക്ഷകൾ നിലനിർത്തി ഇന്ത്യൻ പുരുഷ ഹോക്കി ടീം. നിർണായക കളിയിൽ സ്--പെയ്നിനെ മൂന്ന് ഗോളിന് കീഴടക്കി. ഓസ്ട്രേലിയയോട് 1–7ന് തോറ്റ ഇന്ത്യക്ക് ജയം അനിവാര്യമായിരുന്നു. പൂൾ എയിൽ ആറ് പോയിന്റുമായി രണ്ടാമതെത്തി മൻപ്രീത് സിങ്ങും കൂട്ടരും. ആറു ടീമുകളാണ് പൂളിൽ. ആദ്യ നാല് സ്ഥാനക്കാർ ക്വാർട്ടറിലേക്ക് മുന്നേറും. ആകെ രണ്ടു പൂളുകളാണ്. നാളെ അർജന്റീനയും 30ന് ജപ്പാനുമായാണ് ഇന്ത്യയുടെ കളി.

ഇരട്ടഗോളടിച്ച രുപീന്ദർപാൽ സിങ്ങാണ് ഇന്ത്യയുടെ വിജയശിൽപ്പി. സിമ്രാൻജീത് സിങ് മറ്റൊന്ന് നേടി. സ്‌പെയ്‌നിനെതിരെ സമ്പൂർണ ആധിപത്യത്തോടെയാണ് ഇന്ത്യ കളിച്ചത്. പിഴവുകൾ ഒന്നും വരുത്തിയില്ല. പെനൽറ്റി സ്ട്രോക്കിലൂടെയും കോർണറിലൂടെയുമാണ് രുപീന്ദർ ലക്ഷ്യംകണ്ടത്. വനിതകൾ ഇന്ന് ബ്രിട്ടനെ നേരിടും.