മിക്‌സഡ്‌ റിലേയിൽ അനസ്‌
Friday Jul 30, 2021
ടോക്യോ
ഇന്ത്യയുടെ പ്രതീക്ഷയായ 4–-400 മീറ്റർ മിക്‌സഡ്‌ റിലേ ടീമിനെ തീരുമാനിച്ചു. മലയാളിയായ വൈ മുഹമ്മദ്‌ അനസ്‌, തമിഴ്‌നാട്ടിൽനിന്നുള്ള ആരോക്യ രാജീവ്‌, രേവതി വീരമണി, ശുഭ വെങ്കിടേശൻ എന്നിവർ ബാറ്റണുമായി ട്രാക്കിലിറങ്ങും. ഇന്ന്‌ വൈകിട്ട്‌ നാലരയ്‌ക്കാണ്‌ ഹീറ്റ്‌സ്‌. ഫൈനലിലേക്ക്‌ യോഗ്യത നേടിയാൽ നാളെ വൈകിട്ട്‌ 6.05ന്‌ മെഡലിനായി ഇറങ്ങാം.
അനസിന്റെ രണ്ടാം ഒളിമ്പിക്‌സാണ്‌. റിയോയിൽ 400 മീറ്ററിൽ മത്സരിച്ചിരുന്നു. കൊല്ലം നിലമേൽ സ്വദേശിയാണ്. പുരുഷന്മാരുടെ 400 മീറ്റർ ഹർഡിൽസിൽ രാവിലെ 7.25ന്‌ എം പി ജാബിർ ഇറങ്ങും. ഈ ഇനത്തിൽ ഒളിമ്പിക്‌സിൽ ട്രാക്കിലിറങ്ങുന്ന ആദ്യ പുരുഷ അത്‌ലീറ്റാണ്‌. ഏഴ്‌ മലയാളികളാണ്‌ അത്‌ലറ്റിക്‌സിലുള്ളത്‌. എം ശ്രീശങ്കർ (ലോങ്‌ജമ്പ്‌), കെ ടി ഇർഫാൻ (20 കിലോമീറ്റർ നടത്തം), അമോജ്‌ ജേക്കബ്‌, നോഹ നിർമൽ ടോം(4–-400 മീറ്റർ റിലേ) എന്നിവരാണ്‌ ട്രാക്കിലിറങ്ങുക. മിക്‌സഡ്‌ റിലേ ടീമിലുള്ള അലക്‌സ്‌ ആന്റണി ട്രാക്കിൽ ഇറങ്ങില്ല.