പുരുഷ ഹോക്കി ക്വാർട്ടർ ഇന്ന്; ചരിത്രത്തിലാദ്യമായി വനിതകൾ ക്വാർട്ടറിൽ

Saturday Jul 31, 2021

Photo Credit: Twitter/HockeyIndia

ടോക്യോ > പുരുഷ ഹോക്കിയിൽ സെമി ലക്ഷ്യമിട്ട് ഇന്ത്യ. ക്വാർട്ടറിൽ ബ്രിട്ടനാണ് എതിരാളി. ഇന്ന്‌ വെെകിട്ട് 5.30നാണ് മത്സരം. പൂൾ എയിൽ കളിച്ച അഞ്ചിൽ നാലും ജയിച്ചാണ് മൻപ്രീത് സിങ് നയിക്കുന്ന ഇന്ത്യ അവസാന എട്ടിൽ എത്തിയത്. ബ്രിട്ടനാകട്ടെ പൂൾ ബിയിൽ രണ്ടുവീതം ജയവും സമനിലയും ഒരു തോൽവിയും ഉൾപ്പെടെ മൂന്നാമതായാണ് അവസാനിപ്പിച്ചത്.

1980നുശേഷം ആദ്യസെമിയാണ് ടീം ലക്ഷ്യമിടുന്നത്. ലോകറാങ്കിങ്ങിൽ മൂന്നാമതാണ്. എക്കാലത്തെയും മികച്ച സ്ഥാനമാണിത്. ബ്രിട്ടൻ അഞ്ചാമതാണ്. വനിതകൾ ചരിത്രത്തിലാദ്യമായി ക്വാർട്ടറിൽ കടന്നു. ചൊവ്വാഴ്ച ഓസ്ട്രേലിയയെ നേരിടും. അവസാനകളിയിൽ ദക്ഷിണാഫ്രിക്കയെ 4–3ന് തോൽപ്പിച്ചു. വന്ദന കടാരിയ ഹാട്രിക് കുറിച്ചു. ഒളിമ്പിക്സിൽ ഇന്ത്യക്കായി ഹാട്രിക് നേടുന്ന ആദ്യ വനിതാ താരമാണ് വന്ദന. ബ്രിട്ടൻ അയർലൻഡിനെ തോൽപ്പിച്ചതാണ് ഇന്ത്യക്ക് മുന്നേറാനുള്ള വഴിയൊരുക്കിയത്.